17 ਅਪ੍ਰੈਲ (ਗਗਨਦੀਪ ਸਿੰਘ) ਫੂਲ ਟਾਊਨ/ਰਾਮਪੁਰਾ ਫੂਲ: ਪਿਛਲੇ ਲੰਮੇ ਸਮੇਂ ਤੋਂ ਮਾਨਵ ਸਹਾਰਾ ਕਲੱਬ ਰਜਿ.42 ਫੂਲ ਟਾਊਨ ਇਲਾਕੇ ਵਿੱਚ ਆਪਣੀਆਂ ਐਮਰਜੈਂਸੀ ਐਂਬੂਲੈਂਸ ਸੇਵਾਵਾਂ ਪ੍ਰਦਾਨ ਕਰ ਰਿਹਾ ਹੈ। ਉਸੇ ਲੜੀ ਤਹਿਤ ਹੁਣ ਹਾੜੀ ਦੇ ਸੀਜਨ ਨੂੰ ਮੁੱਖ ਰੱਖ ਕੇ ਕਲੱਬ ਵੱਲੋਂ ਪਿੰਡ ਦੇ ਸਹਿਯੋਗ, ਐੱਨ.ਆਰ.ਆਈ ਵੀਰਾਂ ਦੇ ਸਹਿਯੋਗ ਅਤੇ ਪਿੰਡ ਦੇ ਸਮੂਹ ਗੁਰਦੁਆਰਾ ਸਾਹਿਬ ਦੀਆਂ ਪ੍ਰਬੰਧਕ ਕਮੇਟੀਆਂ ਦੇ ਸਹਿਯੋਗ ਨਾਲ ਫਾਇਰਬ੍ਰਿਗੇਡ ਗੱਡੀ ਤਿਆਰ ਕੀਤੀ ਗਈ, ਜਿਸ ਨੂੰ ਪਿਛਲੇ ਦਿਨੀਂ ਹਰੀ ਝੰਡੀ ਦਿੱਤੀ ਗਈ। ਮਿਤੀ 13 ਅਪ੍ਰੈਲ 2026 ਨੂੰ ਪਿੰਡ ਵਿੱਚ ਕਣਕ ਨੂੰ ਅੱਗ ਲੱਗ ਗਈ ਸੀ ਪਰ ਕਲੱਬ ਦੀ ਟੀਮ ਨੇ ਮੌਕੇ ਤੇ ਪਹੁੰਚ ਨੁਕਸਾਨ ਹੋਣ ਤੋਂ ਬਚਾ ਕੀਤਾ ਅਤੇ ਜਿਸ ਲਈ ਪਿੰਡ ਨਿਵਾਸੀਆਂ ਤੇ ਕਿਸਾਨ ਵੀਰਾਂ ਵੱਲੋਂ ਕਲੱਬ ਦੀ ਭਰਪੂਰ ਪ੍ਰਸ਼ੰਸ਼ਾ ਕੀਤੀ ਜਾ ਰਹੀ ਹੈ। ਕਲੱਬ ਦੀ ਟੀਮ ਵੱਲੋਂ ਵਧੇਰੇ ਜਾਣਕਾਰੀ ਦਿੰਦਿਆਂ ਕਿਸਾਨ ਵੀਰਾਂ ਨੂੰ ਕੁਝ ਕੁ ਬੇਨਤੀਆਂ ਕੀਤੀਆਂ ਕਿ ਜਦੋਂ ਕਿਤੇ ਵੀ ਅੱਗ ਲੱਗਣ ਦੀ ਘਟਨਾ ਵਾਪਰਦੀ ਹੈ ਤਾਂ ਕਲੱਬ ਦੀ ਟੀਮ ਨਾਲ ਸਹਿਯੋਗ ਕੀਤਾ ਜਾਵੇ, ਡਰਾਇਵਰ ਨੂੰ ਜਾਂ ਕਲੱਬ ਦੀ ਟੀਮ ਨੂੰ ਪ੍ਰੇਸ਼ਾਨ ਨਾ ਕੀਤਾ ਜਾਵੇ ਭਾਵ ਹਫੜਾ ਦਫੜੀ ਨਾ ਕੀਤੀ ਜਾਵੇ ਅਤੇ ਫਾਇਰਬ੍ਰਿਗੇਡ ਗੱਡੀ ਨੂੰ ਸਹੀ ਪਤਾ ਟਕਾਣਾ ਦੱਸਿਆ ਜਾਵੇ ਤਾਂ ਜੋ ਸਹੀ ਜਗ੍ਹਾ ਤੇ ਗੱਡੀ ਸਮੇਂ ਸਿਰ ਪਹੁੰਚ ਸਕੇ। ਕਲੱਬ ਵੱਲੋਂ ਹੁਣ ਤੱਕ 650 ਕੇਸਾਂ ਤੋਂ ਵੱਧ ਐਮਰਜੈਂਸੀ ਕੇਸ ਕਵਰ ਕੀਤੇ ਜਾ ਚੁੱਕੇ ਹਨ।

ਮਾਨਵ ਸਹਾਰਾ ਕਲੱਬ ਦੇ ਐਮਰਜੈਂਸੀ ਸੰਪਰਕ ਨੰਬਰ 93715-00108, 93714-00108 ਹਨ, ਇਹਨਾਂ ਨੰਬਰਾਂ ਤੇ ਪਿੰਡ ਫੂਲ ਤੋਂ 15 ਕਿੱਲੋਮੀਟਰ ਦੇ ਏਰੀਏ ਤੱਕ ਫੋਨ ਕਰਕੇ ਐਮਰਜੈਂਸੀ ਸੇਵਾਵਾਂ ਲਈ ਜਾ ਸਕਦੀਆਂ ਹਨ।