ਸਨਮਾਨ ਦੀ ਰਸਮ ਸ. ਜਤਿੰਦਰ ਸਿੰਘ ਭੱਲਾ ਚੇਅਰਮੈਨ ਨਗਰ ਸੁਧਾਰ ਟਰੱਸਟ ਬਠਿੰਡਾ ਨੇ ਬਾਖ਼ੂਬੀ ਨਿਭਾਈ ਤੇ ਸਭ ਅਧਿਆਪਕਾਂ ਨੂੰ ਵਧਾਈ ਦਿੱਤੀ ਅਤੇ “ਸਦਾਕਤ” ਪੁਸਤਕ ਲੋਕ ਅਰਪਣ ਕੀਤੀ
ਬਠਿੰਡਾ, 05 ਸਤੰਬਰ (ਗਗਨਦੀਪ ਸਿੰਘ) ਫੂਲ ਟਾਊਨ: ਬੀਤੇ ਦਿਨੀਂ ਮਿਤੀ 05 ਸਤੰਬਰ ਨੂੰ ਬਾਬਾ ਫੂਲ ਯਾਦਗਾਰੀ ਸਾਹਿਤ ਸਭਾ ਫੂਲ ਟਾਊਨ ਜ਼ਿਲ੍ਹਾ ਬਠਿੰਡਾ ਨੇ ਅਧਿਆਪਕ ਦਿਵਸ ਮਨਾਉਂਦਿਆਂ ਵਧੀਆ ਕਾਰਗੁਜਾਰੀ ਦਿਖਾਉਣ ਅਤੇ ਆਪਣੇ ਪੇਸ਼ੇ ਤੋਂ ਹਟ ਕੇ ਸਮਾਜ ਭਲਾਈ ਕੰਮਾਂ ਵਿੱਚ ਯੋਗਦਾਨ ਪਾਉਣ ਵਾਲੇ ਵੱਖ ਵੱਖ ਖੇਤਰਾਂ ਦੇ 9 ਅਧਿਆਪਕਾਂ ਨੂੰ ਪਿੰਡ ਵਿਖੇ ਬਣੇ ਸਾਂਝੀਵਾਲਤਾ ਦੇ ਪ੍ਰਤੀਕ ਮੰਦਰ ਸਿੱਧ ਬੀਬੀ ਪਾਰੋ ਵਿਖੇ “ਬਾਬਾ ਫੂਲ ਯਾਦਗਾਰੀ ਐਵਾਰਡ” ਨਾਲ ਸਨਮਾਨਿਤ ਕੀਤਾ। ਸਮਾਗਮ ਦੀ ਆਰੰਭਤਾ ਪਿੰਡ ਦਾ ਮਾਣ ਪ੍ਰਸਿੱਧ ਗਾਇਕ ਬੌਬੀ ਸਿੱਧੂ ਨੇ ਇੱਕ ਸੂਫ਼ੀ ਗੀਤ ਨਾਲ ਕੀਤੀ। ਇਹ ਸਨਮਾਨ ਦੀ ਰਸਮ ਸਾਹਿਤ ਸਭਾ ਨੇ ਸ. ਜਤਿੰਦਰ ਸਿੰਘ ਭੱਲਾ ਚੇਅਰਮੈਨ ਨਗਰ ਸੁਧਾਰ ਟਰੱਸਟ ਬਠਿੰਡਾ ਤੋਂ ਕਰਵਾਈ। ਮੁੱਖ ਮਹਿਮਾਨ ਸ. ਇੰਦਰਜੀਤ ਸਿੰਘ ਮਾਨ ਚੇਅਰਮੈਨ ਖਾਦੀ ਗ੍ਰਾਮ ਉਦਯੋਗ ਪੰਜਾਬ ਜ਼ਰੂਰੀ ਰੁਝੇਵੇਂ ਕਾਰਨ ਬੇਸ਼ੱਕ ਹਾਜ਼ਰ ਨਹੀਂ ਹੋ ਸਕੇ, ਪਰ ਸਾਹਿਤ ਸਭਾ ਨੇ ਕਿਹਾ ਕਿ ਉਹਨਾਂ ਦਾ ਅਸ਼ੀਰਵਾਦ ਤੇ ਸਹਿਯੋਗ ਹਮੇਸ਼ਾ ਹੀ ਸਾਡੇ ਨਾਲ ਹੈ। ਸ. ਜਤਿੰਦਰ ਸਿੰਘ ਭੱਲਾ ਨੇ ਕਿਹਾ ਕਿ ਅਧਿਆਪਕਾਂ ਦਾ ਸਨਮਾਨ ਕਰਕੇ ਸਾਹਿਤ ਸਭਾ ਨੇ ਬੜਾ ਸ਼ਲਾਘਾਯੋਗ ਉਪਰਾਲਾ ਕੀਤਾ ਹੈ ਅਤੇ ਅਧਿਆਪਕ ਦਿਵਸ ਦੀਆਂ ਬਹੁਤ ਬਹੁਤ ਮੁਬਾਰਕਾਂ ਦਿੱਤੀਆਂ। ਉਹਨਾਂ ਦੇ ਨਾਲ ਮੁੱਖ ਮਹਿਮਾਨ ਦੀ ਰਸਮ ਤੇ ਸਨਮਾਨ ਮੌਕੇ ਸ. ਸੁਰਜੀਤ ਸਿੰਘ ਜੀ ਚੇਲਾ ਭਾਈਰੂਪਾ (ਮੁਖੀ ਵਿਰਾਸਤੀ ਬਾਗ਼ ਅਤੇ ਸਨਰਾਈਜ਼ ਪਬਲਿਕ ਸਕੂਲ) ਅਤੇ ਪ੍ਰਿੰਸੀਪਲ ਬਲਵੀਰ ਸਿੰਘ ਸਨੇਹੀ (ਚੇਅਰਮੈਨ ਗੁਰੂ ਕਾਸ਼ੀ ਸਾਹਿਤ ਅਕਾਦਮੀ ਦਮਦਮਾ ਸਾਹਿਬ ਰਜਿ. ਪੰਜਾਬ) ਸ਼ਾਮਿਲ ਹੋਏ। ਸਮਾਗਮ ਦੌਰਾਨ ਹਾਜ਼ਰ ਕਵੀਆਂ ਦਾ ਕਵੀ ਦਰਬਾਰ ਹੋਇਆ ਤੇ ਨਿਹਾਲ ਸਿੰਘ ਵਾਲਾ ਸਾਹਿਤ ਸਭਾ, ਪੱਤੋ ਹੀਰਾ ਸਿੰਘ ਸਾਹਿਤ ਸਭਾ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਹੋਈਆਂ ਅਤੇ ਹੋਰ ਵੀ ਜਿਵੇਂ ਲੋਕ ਗਾਇਕੀ, ਕਵੀਸ਼ਰੀ, ਕਮੇਡੀ ਤੇ ਮਮਿਕਰੀ ਆਦਿ ਦਾ ਸਰੋਤਿਆਂ ਨੂੰ ਅਨੰਦ ਮਾਨਣ ਦਾ ਮੌਕਾ ਮਿਲਿਆ। ਦੂਜੇ ਪੜਾਅ ਵਿੱਚ ਲੇਖਿਕਾ ਹਰਨਫਸ ਦੀ ਪਲੇਠੀ ਪੁਸਤਕ “ਸਦਾਕਤ” ਲੋਕ ਅਰਪਣ ਕੀਤੀ ਗਈ। ਜਿਸ ਵਿੱਚ ਕੁਲਦੀਪ ਸਿੰਘ ਦੀਪ ਸਾਦਿਕ ਪਬਲੀਕੇਸ਼ਨਜ਼ ਜੋਧਪੁਰ ਪਾਖਰ ਦਾ ਬੜਾ ਵੱਡਾ ਯੋਗਦਾਨ ਹੈ। ਅਧਿਆਪਕ ਦਿਵਸ ਮੌਕੇ ਸਨਮਾਨਿਤ ਕੀਤੇ ਅਧਿਆਪਕ ਜਿਵੇਂ: ਰਾਜਬੀਰ ਕੌਰ ਗਰੇਵਾਲ, ਦੀਪਾਲੀ ਮਿੱਤਲ, ਜਗਤਾਰ ਸਿੰਘ ਸੋਖੀ, ਸੰਦੀਪ ਕੁਮਾਰ, ਗੁਰਪਿਆਰ ਸਿੰਘ, ਸੁਖਪਾਲ ਸਿੰਘ ਸਿੱਧੂ, ਯਸ਼ਪਾਲ, ਜਸਵਿੰਦਰ ਸਿੰਘ ਅਤੇ ਬਲਕੌਰ ਸਿੰਘ ਸ਼ਾਮਿਲ ਹੋਏ। ਸਭਾ ਦੇ ਪ੍ਰਧਾਨ ਸ਼ਮਸ਼ੇਰ ਸਿੰਘ ਮੱਲ੍ਹੀ ਅਤੇ ਸਕੱਤਰ ਗਗਨ ਫੂਲ ਨੇ ਸਟੇਜ ਦੀ ਕਾਰਵਾਈ ਬਾਖ਼ੂਬੀ ਨਿਭਾਈ। ਇਸ ਤਰ੍ਹਾਂ ਸਮਾਗਮ ਆਪਣੀ ਸਫ਼ਲਤਾ ਵੱਲ ਵੱਧਦਾ ਹੋਇਆ ਸੰਪੰਨ ਹੋਇਆ।
