ਮਾਨਸਾ 1 ਜੂਨ (ਨਾਨਕ ਸਿੰਘ ਖੁਰਮੀ ):ਸਿੱਖਿਆ ਵਿਭਾਗ ਦੀਆਂ ਹਦਾਇਤਾਂ ਮੁਤਾਬਕ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ (ਲੜਕੀਆਂ) ਮਾਨਸਾ ਵਿਖੇ ਏਕ ਭਾਰਤ, ਸ਼੍ਰੇਸ਼ਠ ਭਾਰਤ ਅਧੀਨ ਸੱਤ ਰੋਜ਼ਾ ਸਮਰ ਕੈੰਪ ਦੀ ਸ਼ੁਰੂਆਤ ਇੰਚਾਰਜ ਪ੍ਰਿੰਸੀਪਲ ਗੁਰਸਿਮਰ ਕੌਰ ਅਤੇ ਸਮਰ ਕੈੰਪ ਦੇ ਨੋਡਲ ਅਫ਼ਸਰ ਡਾ. ਵਿਨੋਦ ਮਿੱਤਲ ਪੰਜਾਬੀ ਅਧਿਆਪਕ ਦੀ ਅਗਵਾਈ ਹੇਠ ਕੀਤੀ ਗਈ। ਇਹ ਸੱਤ ਰੋਜ਼ਾ ਕੈੰਪ ਸਕੂਲ ਵਿੱਚ ਹੀ ਮਿਤੀ 26 ਮਈ 2025 ਤੋਂ 01 ਜੂਨ 2025 ਤੱਕ ਲਗਾਇਆ ਗਿਆ, ਜਿਸ ਵਿੱਚ ਕੈੰਪ ਦੇ ਪ੍ਰਬੰਧਕ ਅਧਿਆਪਕ ਡਾ. ਵਿਨੋਦ ਮਿੱਤਲ, ਸ਼ੁਸ਼ਮਾ ਗੁਪਤਾ, ਨੀਰੂ ਬਾਲਾ, ਸਵੀਟੀ, ਅਨੁਪਮ ਅਤੇ ਜੋਤੀ ਵਰਮਾ ਵੱਲੋਂ ਛੇਵੀਂ ਤੋਂ ਦਸਵੀਂ ਤੱਕ ਦੇ 76 ਵਿਦਿਆਰਥੀਆਂ ਨੂੰ ਵੱਖ-ਵੱਖ ਗਤੀਵਿਧੀਆਂ ਕਰਵਾਈਆ ਗਈਆਂ । ਬੱਚਿਆਂ ਨੇ ਇਸ ਸਮਰ ਕੈੰਪ ਵਿੱਚ ਬਹੁਤ ਰੁਚੀ ਲਈ ਅਤੇ ਉਤਸ਼ਾਹ ਦਿਖਾਇਆ। ਕੈੰਪ ਦੌਰਾਨ ਵਿਦਿਆਰਥੀਆਂ ਨੂੰ ਤੇਲਗੂ ਭਾਸ਼ਾ ਨਾਲ ਸੰਬੰਧਤ ਵੱਖ-ਵੱਖ ਗਤੀਵਿਧੀਆਂ ਕਰਵਾਈਆਂ ਗਈਆ। ਡਾ. ਵਿਨੋਦ ਮਿੱਤਲ ਤੇ ਸ਼ੁਸ਼ਮਾ ਗੁਪਤਾ ਵੱਲੋਂ ਵਿਦਿਆਰਥੀਆਂ ਨੂੰ ਤੇਲਗੂ ਭਾਸ਼ਾ ਦੇ ਅੱਖਰ, ਸ਼ਬਦ, ਗਿਣਤੀ ਲਿਖਣੀ, ਆਮ ਬੋਲ-ਚਾਲ ਦੇ ਵੱਖਰੇ-ਵੱਖਰੇ ਸ਼ਬਦ ਕਰਵਾਏ ਗਏ। ਨੀਰੂ ਬਾਲਾ ਤੇ ਸਵੀਟੀ ਵੱਲੋਂ ਸਲੋਗਨ, ਸਬਜੀਆਂ ਤੇ ਫਲਾਂ ਦੇ ਨਾਮ, ਮਸਾਲੇ, ਪਕਵਾਨ, ਰੋਜ਼ਾਨਾ ਵਰਤੋਂ ਦੇ ਸ਼ਬਦ ਕਰਵਾਏ ਗਏ। ਅਨੁਪਮ ਤੇ ਜੋਤੀ ਵਰਮਾ ਵੱਲੋਂ ਸਥਾਨਕ ਹੀਰੋ, ਇਤਿਹਾਸ, ਦੇਸ਼ ਭਗਤੀ ਸੰਬੰਧੀ ਗੀਤ, ਸਾਜ਼, ਪ੍ਰਮੁੱਖ ਨਦੀਆਂ, ਸੁੰਤਰਤਾ ਸੰਗਰਾਮੀ, ਇਤਹਾਸਿਕ ਸਮਾਰਕ, ਲੋਕ ਨਾਚ ਆਦਿ ਕਰਵਾਈਆ ਗਈਆ। ਵਿਦਿਆਰਥੀਆਂ ਨੇ ਤੇਲਗੂ ਭਾਸ਼ਾ ਨਾਲ ਸੰਬੰਧਤ ਇਨ੍ਹਾਂ ਗਤੀਵਿਧੀਆਂ ਵਿੱਚ ਵੱਧ-ਚੜ ਕੇ ਹਿੱਸਾ ਲਿਆ। ਵਿਦਿਆਰਥੀਆਂ ਵੱਲੋਂ ਵੱਖ-ਵੱਖ ਚੀਜ਼ਾਂ ਨਾਲ ਸੰਬੰਧਤ ਬਹੁਤ ਸੋਹਣੇ-ਸੋਹਣੇ ਚਾਰਟ, ਮਾਡਲ ਅਤੇ ਸਕਰੈਪ ਬੁੱਕਾਂ ਤਿਆਰ ਕੀਤੀਆਂ ਗਈਆਂ। ਵੱਖ-ਵੱਖ ਅਧਿਆਪਕਾਂ ਵੱਲੋਂ ਸਮਰ ਕੈੰਪ ਵਿੱਚ ਵਿਦਿਆਰਥੀਆਂ ਨਾਲ ਤੇਲਗੂ ਭਾਸ਼ਾ ਬਾਰੇ ਭਾਂਤ-ਭਾਂਤ ਦੀ ਗੱਲਬਾਤ ਕੀਤੀ ਗਈ। ਤੇਲਗੂ ਭਾਸ਼ਾ ਨਾਲ ਸੰਬੰਧਤ ਵੱਖ-ਵੱਖ ਵੀਡੀਓ ਵੀ ਬੱਚਿਆਂ ਨੂੰ ਦਿਖਾਈਆ ਗਈਆਂ। ਨੋਡਲ ਇੰਚਾਰਜ਼ ਡਾ. ਵਿਨੋਦ ਮਿੱਤਲ ਨੇ ਕਿਹਾ ਕਿ ਸਾਰੇ ਹੀ ਵਿਦਿਆਰਥੀਆਂ ਵੱਲੋਂ ਸਮਰ ਕੈੰਪ ਵਿਚ ਉਤਸ਼ਾਹ ਪੂਰਨ ਹਿੱਸਾ ਲੈਂਦਿਆ ਬਹੁਤ ਸੁੰਦਰ ਪੇਸ਼ਕਾਰੀਆਂ ਦਿੱਤੀਆਂ ਗਈਆਂ।
ਅਖੀਰਲੇ ਦਿਨ ਇਸ ਸਮਰ ਕੈਂਪ ਵਿੱਚ ਭਾਗ ਲੈਣ ਵਾਲੇ ਸਾਰੇ ਹੀ ਵਿਦਿਆਰਥੀਆਂ ਨੂੰ ਇੰਚਾਰਜ਼ ਪ੍ਰਿੰਸੀਪਲ ਗੁਰਸਿਮਰ ਕੌਰ ਤੇ ਸਮੁੱਚੀ ਪ੍ਰਬੰਧਕੀ ਟੀਮ ਵੱਲੋਂ ਸਰਟੀਫਿਕੇਟ ਦਿੱਤੇ ਗਏ ਅਤੇ ਰਿਫਰੈਸ਼ਮੈੰਟ ਵੰਡੀ ਗਈ। ਇਸ ਤਰ੍ਹਾਂ ਇਹ ਕੈੰਪ ਭਾਰਤ ਦੇ ਹੋਰਨਾਂ ਰਾਜਾਂ ਦੀ ਭਾਸ਼ਾ, ਸੰਸਕ੍ਰਿਤੀ ਅਤੇ ਸੱਭਿਆਚਾਰ ਬਾਰੇ ਜਾਣ-ਪਹਿਚਾਣ ਨੂੰ ਉਤਸ਼ਾਹਿਤ ਕਰਦੇ ਹੋਏ ਯਾਦਗਾਰੀ ਹੋ ਨਿਬੜਿਆ।