ਬੋਹਾ 3 ਦਸੰਬਰ ( ਨਿਰੰਜਣ ਬੋਹਾ)
ਸਰਕਾਰੀ ਸੈਕੰਡਰੀ ਸਮਾਰਟ ਸਕੂਲ ਰਾਮਗੜ੍ਹ ਸ਼ਾਹਪੁਰੀਆਂ ਵੱਲੋ ਇਕ ਸਨਮਾਨ ਸਮਾਰੋਹ ਦਾ ਆਯੋਜਨ ਸਕੂਲ ਮੁਖੀ ਦਿਲਬਾਗ ਰਿਉਂਦ ਜੀ ਦੀ ਅਗਵਾਈ ਵਿੱਚ ਕੀਤਾ ਗਿਆ। ਇਸ ਸਮਾਗਮ ਵਿੱਚ ਸਕੂਲ ਦੇ ਸੇਵਾ ਮੁਕਤ ਪਿ੍ੰਸੀਪਲ ਮੇਲਾ ਸਿੰਘ ਵੱਲੋ ਪਿਛਲੇ ਸ਼ੈਸ਼ਨ ਦੇ ਛੇਵੀਂ ਤੋਂ ਬਾਰਵੀਂ ਪਹਿਲੀਆਂ ਤਿੰਨ ਪੁਜ਼ੀਸ਼ਨਾਂ ਵਾਲੇ ਅਤੇ ਪੰਦਰਾਂ ਲੋੜਵੰਦ ਵਿਦਿਆਰਥੀਆਂ ਦਾ ਨਗਦ ਰਾਸ਼ੀ ਦੇ ਕੇ ਸਨਮਾਨ ਕੀਤਾ ਗਿਆ। ਮੰਚ ਸੰਚਾਲਨ ਕਰਦਿਆਂ ਸੁਰਜੀਤ ਸਿੰਘ ਨੇ ਕਿਹਾ ਕਿ ਸਾਲ 2013 ਤੋਂ ਸ ਮੇਲਾ ਸਿੰਘ ਮੰਡੇਰ ਨਿਰਵਿਘਨ ਹਰ ਸਾਲ ਆਪਣੀ ਕਰਮਭੂਮੀ ਸਕੂਲ ਵਿੱਚ ਆਉਂਦੇ ਹਨ ਅਤੇ ਇਸ ਕਾਰਜ ਨੂੰ ਆਪਣੀ ਰਿਟਾਇਰਮੈਂਟ ਤੋਂ ਲੈ ਕੇ ਅੱਜ ਤੱਕ ਸਫਲਤਾਪੂਰਵਕ ਚਲਾ ਰਹੇ ਹਨ। ਫਸਟ ਵਿਦਿਆਰਥੀ ਨੂੰ ਗਿਆਰਾਂ ਸੌ, ਸੈਕੰਡ ਸੱਤ ਸੌ , ਥਰੜ ਨੂੰ ਪੰਜ ਸੌ ਅਤੇ ਲੋੜਵੰਦ ਵਿਦਿਆਰਥੀ ਨੂੰ ਤਿੰਨ ਸੌ ਰੁਪਏ ਨਗਦ ਰਾਸ਼ੀ ਤਕਸੀਮ ਕੀਤੀ ਗਈ। ਇਸ ਸਮਾਗਮ ਵਿੱਚ ਪਿੰਡ ਰਾਮਗੜ੍ਹ ਸ਼ਾਹਪੁਰੀਆਂ ਦੇ ਸਰਪੰਚ ਮਨਪ੍ਰੀਤ ਸਿੰਘ ਸਮੂਹ ਪੰਚ ਤੇ ਪਿੰਡ ਆਂਡਿਆਂਵਾਲੀ ਦੇ ਸਰਪੰਚ ਨੈਬ ਸਿੰਘ. ਵੀ ਹਾਜਰ ਸਨ । ਅਧਿਆਪਕ ਜਸਵਿੰਦਰ ਸਿੰਘ ਨੇ ਕਿਹਾ ਕਿ ਮੇਲਾ ਸਿੰਘ ਮੰਡੇਰ ਨੇ ਛੱਤੀ ਸਾਲ ਇਸ ਕਰਮਭੂਮੀ ਵਿੱਚ ਆਪਣੀਆਂ ਸੇਵਾਵਾਂ ਦਿੱਤੀਆਂ ਹਨ ਤੇ ਉਨ੍ਹਾਂ ਦੇ ਕਾਰਜ਼ਕਾਲ ਸਮੇਂ ਹੀ ਇਹ ਸਕੂਲ ਮਿਡਲ ਤੋਂ ਹਾਈ ਅਤੇ ਹਾਈ ਤੋਂ ਸੈਕੰਡਰੀ ਬਣਿਆ ਹੈ । ਇਸ ਸਮੇ ਪਿ੍ੰਸੀਪਲ ਮੇਲਾ ਸਿੰਘ ਨੇ ਕਿਹਾ ਕਿ ਵਿਦਿਆਰਥੀਆ ਨੂੰ ਅੱਗੇ ਵੱਧਣਾ ਵੇਖਣਾ ਉਨ੍ਹਾਂ ਦੀ ਰੂਹ ਦੀ ਖੁਰਾਕ ਹੈ । ਜਦੋਂ ਤੱਕ ਉਨ੍ਹਾਂ ਦੇ ਸਰੀਰ ਵਿੱਚ ਸਾਹ ਹਨ ਉਹ ਇਹ ਕਾਰਜ ਕਰਦੇ ਰਹਿਣਗੇ। ਉਨ੍ਹਾਂ ਦੇ ਬੇਟੇ ਇੰਜੀਨੀਅਰ ਸਤਵੀਰ ਸਿੰਘ ਮੰਡੇਰ ਨੇ ਦੱਸਿਆ ਕਿ ਉਹ ਵੀ ਇਸੇ ਸਕੂਲ ਦੇ ਵਿਦਿਆਰਥੀ ਹਨ। ਉਹ ਆਪਣੇ ਪਿਤਾ ਦੀ ਨੌਕਰੀ ਸਮੇਂ ਇਸੇ ਸਕੂਲ ਵਿੱਚ ਪੜ੍ਹਦੇ ਰਹੇ ਹਨ।
ਸਕੂਲ ਦੇ ਇੰਚਾਰਜ਼ ਦਿਲਬਾਗ ਰਿਉਂਦ ਜੀ ਨੇ ਕਿਹਾ ਕਿ ਅੱਜ ਦੇ ਇਸ ਪਦਾਰਥਵਾਦੀ ਸਮੇਂ ਵਿੱਚ ਵਿਰਲੇ ਅਤੇ ਵਿਲੱਖਣ ਇਨਸਾਨ ਹੀ ਹਨ ਜੋ ਅਜਿਹੇ ਕਾਰਜਾਂ ਵਿੱਚ ਮੋਹਰੀ ਰੋਲ ਅਦਾ ਕਰ ਰਹੇ ਹਨ। ਇਸ ਸਮੇਂ ਉਪਰੋਕਤ ਤੋਂ ਇਲਾਵਾ ਮੋਨੂੰ ਸਿੰਗਲਾ ਜੀ, ਜਗਦੀਪ ਸਿੰਘ ਜੀ, ਮਨਜਿੰਦਰ ਸਿੰਘ , ਮੈਡਮ ਰਾਜਦੀਪ ਕੌਰ , ਮੈਡਮ ਰੇਖਾ ਰਾਣੀ , ਸਚਿਨ ਸਿੰਗਲਾ , ਯਸ਼ਪ੍ਰੀਤ ਸਿੰਘ ਜੀ , ਲਲਿਤ ਕੁਮਾਰ ਵੀ ਹਾਜ਼ਰ ਸਨ।
ਫੋਟੋ – ਸਨਮਾਨਿਤ ਹੋਣ ਵਾਲੇ ਵਿਦਿਆਰਥੀ ਮੁੱਖ ਮਹਿਮਾਨ ਮੇਲਾ ਸਿੰਘ ਤੇ ਸਕੂਲ ਸਟਾਫ ਨਾਲ