ਮਾਂ ਦੀ ਯਾਦ ਨੂੰ ਮਿੱਟੀ ‘ਚ ਬੀਜਿਆ, ਹੁਣ ਰੁੱਖ ਬਣ ਕੇ ਦੇਵੇਗੀ ਛਾਂ

                       ਮਾਤਾ ਦੀ ਇੱਛਾ ਅਨੁਸਾਰ ਫੁੱਲ ਤੇ ਰਾਖ ਖੇਤਾਂ ਵਿੱਚ ਪਾ ਕੇ ਲਗਾਏ ਮਾਨ ਪਰਿਵਾਰ ਨੇ ਫ਼ਲਦਾਰ ਪੌਦੇ

ਨਾਨਕ ਸਿੰਘ ਖੁਰਮੀ,ਮਾਨਸਾ 10 ਨਵੰਬਰ :ਮਾਂ ਦੀ ਯਾਦ ਨੂੰ ਸਿਰਫ਼ ਤਸਵੀਰਾਂ ਅਤੇ ਯਾਦਾਂ ਤੱਕ ਸੀਮਤ ਰੱਖਣ ਦੀ ਥਾਂ ਜੇ ਉਸ ਨੂੰ ਰੁੱਖਾਂ ਦੀ ਛਾਂ, ਫੁੱਲਾਂ ਦੀ ਮਹਿਕ ਅਤੇ ਫ਼ਲਾਂ ਦੀ ਮਿਠਾਸ ਵਿੱਚ ਜਿਊਂਦਾ ਰੱਖਿਆ ਜਾਵੇ ਤਾਂ ਇਸ ਤੋਂ ਵੱਡੀ ਸ਼ਰਧਾਂਜਲੀ ਹੋਰ ਕੀ ਹੋ ਸਕਦੀ ਹੈ। ਪੰਜਾਬੀ ਟ੍ਰਿਬਿਊਨ ਦੇ ਸੀਨੀਅਰ ਪੱਤਰਕਾਰ ਜੋਗਿੰਦਰ ਸਿੰਘ ਮਾਨ ਅਤੇ ਜਗਮੀਤ ਸਿੰਘ ਮਾਨ ਦੇ ਪਰਿਵਾਰ ਨੇ ਆਪਣੀ ਮਾਤਾ ਸਰਦਾਰਨੀ ਬਲਵੀਰ ਕੌਰ ਦੀ ਇੱਛਾ ਦਾ ਸਤਿਕਾਰ ਕਰਦਿਆਂ ਅਜਿਹਾ ਹੀ ਇੱਕ ਭਾਵਪੂਰਤ ਅਤੇ ਵਾਤਾਵਰਨ ਪੱਖੀ ਉਪਰਾਲਾ ਕੀਤਾ ਹੈ। ਮਾਤਾ ਦੇ ਅਕਾਲ ਚਲਾਣੇ ਮਗਰੋਂ ਪਰਿਵਾਰ ਨੇ ਰਵਾਇਤੀ ਰਸਮ ਅਨੁਸਾਰ ਫੁੱਲ ਅਤੇ ਰਾਖ ਕਿਸੇ ਜਲ ਸਰੋਤ ਵਿੱਚ ਪ੍ਰਵਾਹਿਤ ਕਰਨ ਦੀ ਥਾਂ ਆਪਣੇ ਖੇਤਾਂ ਦੀ ਮਿੱਟੀ ਵਿੱਚ ਸਮਾਏ ਅਤੇ ਉੱਥੇ ਫ਼ਲਦਾਰ ਪੌਦੇ ਲਗਾਏ।ਇਹ ਸਿਰਫ਼ ਪੌਦੇ ਲਗਾਉਣ ਦੀ ਰਸਮ ਨਹੀਂ, ਸਗੋਂ ਮਾਂ ਦੀ ਆਖ਼ਰੀ ਇੱਛਾ ਨੂੰ ਪੂਰਾ ਕਰਨ ਅਤੇ ਉਸ ਦੀ ਯਾਦ ਨੂੰ ਕੁਦਰਤ ਨਾਲ ਜੋੜਨ ਦਾ ਇੱਕ ਅਨੋਖਾ ਤਰੀਕਾ ਹੈ। ਜਿੱਥੇ ਕਦੇ ਮਾਤਾ ਦੀਆਂ ਯਾਦਾਂ ਨਾਲ ਜੁੜੀ ਮਿੱਟੀ ਵਿੱਚ ਇਹ ਪੌਦੇ ਵਧਣਗੇ, ਉੱਥੇ ਸਮੇਂ ਦੇ ਨਾਲ ਉਨ੍ਹਾਂ ਦੀਆਂ ਟਹਿਣੀਆਂ ਛਾਂ ਦੇਣਗੀਆਂ ਅਤੇ ਫ਼ਲ ਆਉਣ ਵਾਲੀਆਂ ਪੀੜ੍ਹੀਆਂ ਦੇ ਕੰਮ ਆਉਣਗੇ। ਇਸ ਤਰ੍ਹਾਂ ਇੱਕ ਮਾਂ ਦੀ ਯਾਦ ਪਰਿਵਾਰ ਦੀਆਂ ਹੱਦਾਂ ਤੋਂ ਅੱਗੇ ਵਧ ਕੇ ਕੁਦਰਤ ਦੀ ਸਾਂਝੀ ਵਿਰਾਸਤ ਬਣੇਗੀ।84 ਵਰ੍ਹਿਆਂ ਦੀ ਸਰਦਾਰਨੀ ਬਲਵੀਰ ਕੌਰ ਦਾ ਦਿਲ ਦਾ ਦੌਰਾ ਪੈਣ ਕਾਰਨ ਦੇਹਾਂਤ ਹੋ ਗਿਆ ਸੀ। ਉਹ ਚੜ੍ਹਦੀ ਕਲਾ ਵਿੱਚ ਰਹਿਣ ਵਾਲੇ, ਹੌਸਲੇ ਅਤੇ ਹਾਂ-ਪੱਖੀ ਸੋਚ ਦੇ ਮਾਲਕ ਸਨ। ਉਨ੍ਹਾਂ ਦਾ ਮਿਲਾਪੜਾ ਸੁਭਾਅ ਅਤੇ ਜ਼ਿੰਦਗੀ ਪ੍ਰਤੀ ਸਕਾਰਾਤਮਕ ਨਜ਼ਰੀਆ ਪਰਿਵਾਰ ਤੇ ਜਾਣਕਾਰਾਂ ਦੇ ਮਨਾਂ ਵਿੱਚ ਹਮੇਸ਼ਾ ਵਸਿਆ ਰਹੇਗਾ। ਪਰਿਵਾਰਕ ਮੈਂਬਰਾਂ ਅਤੇ ਰਿਸ਼ਤੇਦਾਰਾਂ ਨੇ ਮਾਤਾ ਦੀ ਇੱਛਾ ਅਨੁਸਾਰ ਖੇਤਾਂ ਵਿੱਚ ਫੁੱਲ ਤੇ ਰਾਖ ਪਾਉਣ ਅਤੇ ਫ਼ਲਦਾਰ ਪੌਦੇ ਲਗਾਉਣ ਦੇ ਕਾਰਜ ਵਿੱਚ ਸ਼ਮੂਲੀਅਤ ਕੀਤੀ।ਪਰਿਵਾਰ ਦਾ ਮੰਨਣਾ ਹੈ ਕਿ ਜਦੋਂ ਇਹ ਪੌਦੇ ਵੱਡੇ ਹੋਣਗੇ ਅਤੇ ਫ਼ਲ ਦੇਣਗੇ ਤਾਂ ਮਾਤਾ ਦੀ ਯਾਦ ਹਰ ਮੌਸਮ ਵਿੱਚ ਉਨ੍ਹਾਂ ਦੇ ਨਾਲ ਹੋਵੇਗੀ। ਇਨ੍ਹਾਂ ਦੀ ਛਾਂ ਹੇਠ ਬੈਠਣ ਵਾਲੇ ਅਤੇ ਇਨ੍ਹਾਂ ਦੇ ਫ਼ਲ ਖਾਣ ਵਾਲੇ ਲੋਕ ਵੀ ਅਣਜਾਣੇ ਵਿੱਚ ਉਸ ਮਾਂ ਦੀ ਯਾਦ ਨਾਲ ਜੁੜਨਗੇ, ਜਿਸ ਦੀ ਇੱਛਾ ਨੇ ਇਸ ਹਰਿਆਵਲ ਨੂੰ ਜਨਮ ਦਿੱਤਾ।ਮਾਤਾ ਸਰਦਾਰਨੀ ਬਲਵੀਰ ਕੌਰ ਨਮਿੱਤ ਪਾਠ ਦਾ ਭੋਗ 17 ਨਵੰਬਰ, ਮੰਗਲਵਾਰ ਨੂੰ ਦੁਪਹਿਰ 12:30 ਵਜੇ ਗੁਰਦੁਆਰਾ ਸਾਹਿਬ, ਪਿੰਡ ਟਿੱਬੀ ਹਰੀ ਸਿੰਘ ਵਾਲਾ, ਨੇੜੇ ਸਰਦੂਲਗੜ੍ਹ (ਮਾਨਸਾ) ਵਿਖੇ ਪਵੇਗਾ।

ਫੋਟੋ 6: ਖੇਤਾਂ ਵਿੱਚ ਫੁੱਲ ਤੇ ਰਾਖ ਪਾਉਣ ਅਤੇ ਫ਼ਲਦਾਰ ਪੌਦੇ ਲਗਾਉਣ ਦੇ ਕਾਰਜ