ਦੁਨੀਆਂ ਬਹੁਤ ਵੱਡੀ ਹੈ ਤੁਹਾਨੂੰ ਇੱਥੇ ਵੱਖ- ਵੱਖ ਕਿੱਤਿਆਂ ਦੇ ਲੋਕ, ਭੋਲੇ ,ਚੁਸਤ ,ਚਲਾਕ ,ਬੇਈਮਾਨ, ਠੱਗ, ਚੋਰ ,ਇਮਾਨਦਾਰ , ਵਫਾਦਾਰ,ਸਭ ਤਰ੍ਹਾਂ ਦੇ ਇਨਸਾਨ ਵੇਖਣ ਨੂੰ ਮਿਲਣਗੇ। ਆਪਣੀ ਹੀ ਦੁਨੀਆਂ ਵਿੱਚ ਲੀਨ ਰਹਿਣ ਵਾਲੇ ਭੋਲੇ ਭਾਲੇ ਲੋਕਾਂ ਵਿੱਚੋਂ ਮੈਨੂੰ ਰੱਬ ਵਿਖਦਾ ਹੈ। ਮੱਘਰ ਮਿੱਠੀ ਭਾਵੇਂ ਅੱਜ ਸਾਡੇ ਵਿਚਕਾਰ ਨਹੀਂ ਰਿਹਾ ਪਰ ਉਸ ਦੀਆਂ ਪਾਈਆਂ ਬੋਲੀਆਂ ਤੇ ਉਸਦੇ ਸਾਦੇ ਪਹਿਰਾਵੇ ਨੂੰ ਵੇਖਦਿਆ ਇੰਝ ਲੱਗਦਾ ਹੈ ਕਿ ਇਹ ਵੀ ਵਿਚਾਰਾ ਰੱਬ ਦਾ ਹੀ ਇੱਕ ਬੰਦਾ ਸੀ। ਨਾਮ ਤਾਂ ਸ਼ਾਇਦ ਮੱਘਰ ਸਿੰਘ ਰੱਖਿਆ ਹੋਵੇਗਾ ਪਰ ਉਸਦੇ ਮਿਠ ਬੋਲੜੇ ਸੁਭਾ ਨੇ ਮੱਘਰ ਸਿੰਘ ਤੋਂ ਮੱਘਰ ਮਿੱਠੀ ਦੇ ਨਾਮ ਨਾਲ ਉਸਨੂੰ ਮਸ਼ਹੂਰ ਕਰ ਦਿੱਤਾ। ਅਸਮਾਨ ਵਿੱਚ ਉੱਡਣ ਵਾਲੇ ਜਹਾਜਾਂ ਤੋਂ ਡਰਨ ਵਾਲਾ ,ਦੂਰ ਦੁਰਾਡੇ ਨਾ ਜਾਣ ਵਾਲਾ ,ਆਪਣੇ ਹੀ ਪਿੰਡ ਦੀ ਮਿੱਟੀ ਨਾਲ ਆਪਣੇ ਲੋਕਾਂ ਦੀ ਮਿੱਟੀ ਨਾਲ ਮੋਹ ਵਾਲਾ, ਬੋਲੀਆਂ ,ਗਿੱਧਾ,ਭੰਗੜਾ ਜਰੀਏ ਲੋਕਾਂ ਦਾ ਦਿਲ ਜਿੱਤਣ ਵਾਲਾ ਮੱਘਰ ਰੱਬ ਦਾ ਬੰਦਾ ਹੀ ਲੱਗਿਆ। ਇਸ ਤਰ੍ਹਾਂ ਹਰ ਪਿੰਡ, ਕਸਬੇ, ਸ਼ਹਿਰ, ਮਹੱਲੇ ਵਿੱਚ ਤੁਹਾਨੂੰ ਰੱਬ ਦੇ ਬੰਦੇ ਵੇਖਣ ਨੂੰ ਮਿਲਣਗੇ।
ਇਨਾਂ ਬੰਦਿਆਂ ਨੂੰ ਦੁਨੀਆਂਦਾਰੀ ਦਾ ਕੋਈ ਬਹੁਤਾ ਮੋਹ ਨਹੀਂ ਹੁੰਦਾ। ਇਹ ਹਰ ਇੱਕ ਇਨਸਾਨ, ਪਸ਼ੂ-ਪੰਛੀ ,ਜਾਨਵਰ ਪ੍ਰਿਥਵੀ ਨੂੰ ਪਿਆਰ ਕਰਨ ਵਾਲੇ ਲੋਕ ਹੁੰਦੇ ਹਨ। ਇਹਨਾਂ ਨੂੰ ਨਾ ਕਿਸੇ ਚੜੀ ਦਾ ਨਾ ਉਤਰੀ ਦਾ ਨਾ ਅਮੀਰੀ ਦਾ ਨਾ ਗਰੀਬੀ ਦਾ ਨਾ ਵੱਡੇ ਹੋਣ ਦਾ ਤੇ ਨਾ ਹੀ ਛੋਟੇ ਹੋਣ ਦਾ ਕੋਈ ਅਹਿਸਾਸ ਹੁੰਦਾ ਹੈ। ਇਹਨਾਂ ਦੀ ਇੱਕ ਵੱਖਰੀ ਹੀ ਦੁਨੀਆ ਹੁੰਦੀ ਹੈ ਜਿੱਥੇ ਸਿਰਫ ਤੇ ਸਿਰਫ ਪਿਆਰ ਹੀ ਮੁਹੱਬਤ ਹੀ ਇਹਨਾਂ ਦੀ ਪਹਿਚਾਣ ਹੁੰਦੀ ਹੈ। ਇਸ ਤਰ੍ਹਾਂ ਦੇ ਭੋਲੇ-ਭਾਲੇ ਲੋਕਾਂ ਨਾਲ ਚਲਾਕੀਆਂ ਕਰਨ ਵਾਲੇ ਲੋਕ ਵੀ ਹਮੇਸ਼ਾ ਸਮਾਜ ਦੀ ਤਰਾਸਦੀ ਦਾ ਸਕਾਰ ਰਹੇ ਹਨ।
ਸਾਨੂੰ ਇਸ ਤਰ੍ਹਾਂ ਦੇ ਭੋਲੇ-ਭਾਲੇ ਬੰਦਿਆਂ ਦੀ ਸਕੂਲਾਂ ਵਿੱਚ ਪੜ੍ਹਦੇ ਬੱਚਿਆਂ ਦੀ ਦਿਲੋਂ ਮਦਦ ਕਰਨੀ ਚਾਹੀਦੀ ਹੈ। ਕਿਸੇ ਵੀ ਇਨਸਾਨ ਦੀ ਕਿਸੇ ਪ੍ਰਕਾਰ ਦੀ ਕਮਜ਼ੋਰੀ ਦਾ ਫਾਇਦਾ ਉਠਾਉਣਾ ਚੰਗੇ ਇਨਸਾਨ ਦਾ ਕੰਮ ਨਹੀਂ ਹੁੰਦਾ। ਮਨੁੱਖ ਨੂੰ ਖਾਣ ਲਈ ਦੋ ਵਕਤ ਦੀ ਰੋਟੀ ਸਾਹ ਲੈਣ ਲਈ ਸ਼ੁੱਧ ਹਵਾ ਤੇ ਪਾਣੀ ਜਰੂਰਤ ਹੁੰਦੀ ਹੈ ਜਿਹੜੀ ਬਹੁਤ ਘੱਟ ਪੈਸਿਆਂ ਨਾਲ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਜੇਕਰ ਅਸੀਂ ਪੈਸੇ ਦੇ ਲਾਲਚ ਵਿੱਚ ਆਪਣਾ ਰਹਿਣ-ਸਹਿਣ ,ਖਾਣ-ਪੀਣ, ਵਾਤਾਵਰਨ ਨੂੰ ਖਰਾਬ ਕਰਾਂਗੇ ਤਾਂ ਸਾਨੂੰ ਇਸਦੇ ਬਹੁਤ ਭਿਆਨਕ ਨਤੀਜੇ ਭੁਗਤਣੇ ਪੈਣਗੇ।
ਭੋਲੇ-ਭਾਲੇ ਬੰਦਿਆਂ ਨਾਲ ਜਿੰਨਾ ਹੋ ਸਕੇ ਪਿਆਰ ਕਰੋ ਅਤੇ ਉਹਨਾਂ ਦੀਆਂ ਸਮੱਸਿਆਵਾਂ ਨੂੰ ਸਮਝਦਿਆਂ ਉਸਦਾ ਹੱਲ ਕਰਨ ਦੀ ਕੋਸ਼ਿਸ਼ ਕਰੋ। ਇਹ ਤਾਂ ਵਿਚਾਰੇ ਰੱਬ ਦੇ ਭਗਤ ਹੁੰਦੇ ਹਨ ਜਿਨਾਂ ਨੂੰ ਬਹੁਤੀਆਂ ਚੁਸਤ ਚਲਾਕੀਆਂ ਨਹੀਂ ਆਉਂਦੀਆਂ। ਇਹਨਾਂ ਦੇ ਜੋ ਦਿਲ ਵਿੱਚ ਹੁੰਦਾ ਹੈ ਉਹ ਇਹ ਮੂੰਹ ਤੇ ਹੀ ਬੋਲਣ ਦੀ ਹਿੰਮਤ ਰੱਖਦੇ ਹਨ। ਫਿਰ ਕਿਸੇ ਨੂੰ ਚੰਗਾ ਲੱਗੇ ਜਾ ਬੁਰਾ। ਹਸੂੰ- ਹਸੂੰ ਕਰਦੇ ਇਹਨਾਂ ਦੇ ਚਿਹਰਿਆਂ ਤੇ ਕਿਸੇ ਚੀਜ਼ ਦੇ ਨਾ ਮਿਲਣ ਨਾ ਪਛਤਾਵਾ ਕਦੇ ਵੀ ਜਾਹਿਰ ਨਹੀਂ ਹੁੰਦਾ। ਇਹ ਪ੍ਰਿਥਵੀ, ਇਹ ਅਸਮਾਨ ,ਇਹ ਸਮਾਜ ਸਾਡੇ ਸਭ ਲਈ ਇੱਕ ਬਰਾਬਰ ਹੈ ਤਾਂ ਆਓ ਰੱਬ ਦੇ ਬੰਦਿਆਂ ਨੂੰ ਖੂਬ ਪਿਆਰ ਕਰੀਏ ਅਤੇ ਉਹਨਾਂ ਦੀਆਂ ਸਮੱਸਿਆਵਾਂ ਦੇ ਹੱਲ ਦੇ ਜਤਨ ਕਰੀਏ।
ਅਮਨਦੀਪ ਸ਼ਰਮਾ ਗੁਰਨੇ ਕਲਾਂ ਤਹਿਸੀਲ ਬੁਢਲਾਡਾ ਜ਼ਿਲ੍ਹਾ ਮਾਨਸਾ।
9876074055
