ਕ੍ਰੋਧ ਮਨੁੱਖ ਦੀ ਬੁੱਧੀ ਨੂੰ ਭ੍ਰਿਸ਼ਟ ਕਰ ਦਿੰਦਾ ਹੈ : ਭਾਰਤ ਕੇਸਰੀ ਡਾ. ਵਰੁਣ ਮੁਨੀ ਜੀ ਮਹਾਰਾਜ

ਨਾਨਕ ਸਿੰਘ ਖੁਰਮੀ,ਮਾਨਸਾ, 11 ਨਵੰਬਰ ਭਾਰਤ ਕੇਸਰੀ, ਓਜਸਵੀ ਪ੍ਰਵਚਨਕਾਰ ਡਾ.ਵਰੁਣ ਮੁਨੀ ਜੀ ਮਹਾਰਾਜ ਵੱਲੋਂ ਆਪਣੀ ਅੰਮ੍ਰਿਤਮਈ ਬਾਣੀ ਅਤੇ ਜੀਵਨ ਨੂੰ ਸਹੀ ਸੇਧ ਦੇਣ ਵਾਲੇ ਪ੍ਰਵਚਨਾਂ ਰਾਹੀਂ ਸ਼ਰਧਾਲੂਆਂ ਨੂੰ ਧਰਮ, ਕਰਮ ਅਤੇ ਪ੍ਰਭੂ ਸਿਮਰਨ ਦੇ ਮਾਰਗ ਨਾਲ ਜੋੜਿਆ ਜਾ ਰਿਹਾ ਹੈ। ਉਨ੍ਹਾਂ ਦੇ ਪ੍ਰਵਚਨਾਂ ਦਾ ਮੁੱਖ ਉਦੇਸ਼ ਮਨੁੱਖ ਨੂੰ ਆਤਮਿਕ ਤੌਰ ’ਤੇ ਜਾਗਰੂਕ ਕਰਨਾ, ਜੀਵਨ ਵਿੱਚ ਸਦਗੁਣਾਂ ਨੂੰ ਅਪਣਾਉਣ ਲਈ ਪ੍ਰੇਰਿਤ ਕਰਨਾ ਅਤੇ ਮਨ ਵਿੱਚ ਪੈਦਾ ਹੋਣ ਵਾਲੀਆਂ ਬੁਰਾਈਆਂ ਤੋਂ ਦੂਰ ਰਹਿਣ ਦਾ ਸੰਦੇਸ਼ ਦੇਣਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਮਨੁੱਖੀ ਜੀਵਨ ਬਹੁਤ ਅਨਮੋਲ ਹੈ ਅਤੇ ਇਸ ਨੂੰ ਵਿਅਰਥ ਦੇ ਝਗੜਿਆਂ, ਗੁੱਸੇ, ਈਰਖਾ ਅਤੇ ਨਫ਼ਰਤ ਵਿੱਚ ਗੁਆਉਣ ਦੀ ਬਜਾਏ ਚੰਗੇ ਕਰਮਾਂ ਅਤੇ ਧਰਮ ਦੇ ਮਾਰਗ ’ਤੇ ਚੱਲ ਕੇ ਸਫ਼ਲ ਬਣਾਉਣਾ ਚਾਹੀਦਾ ਹੈ। ਇਸ ਮੌਕੇ ਮਧੁਰ ਵਕਤਾ ਅਤੇ ਕਰਮਯੋਗੀ ਰੂਪੇਸ਼ ਮੁਨੀ ਜੀ ਮਹਾਰਾਜ ‘ਰਜਤ’ ਨੇ ਪਵਿੱਤਰ ਸੂਤਰ ਦੀ ਮੂਲ ਵਾਚਨਾ ਦਾ ਬਹੁਤ ਹੀ ਸੁੰਦਰ, ਪ੍ਰਭਾਵਸ਼ਾਲੀ ਅਤੇ ਭਾਵਪੂਰਨ ਉਚਾਰਨ ਕੀਤਾ। ਉਨ੍ਹਾਂ ਵੱਲੋਂ ਕੀਤੀ ਗਈ ਮੂਲ ਵਾਚਨਾ ਨੇ ਸਮਾਗਮ ਵਿੱਚ ਮੌਜੂਦ ਸ਼ਰਧਾਲੂਆਂ ਨੂੰ ਆਤਮਿਕ ਆਨੰਦ ਅਤੇ ਧਾਰਮਿਕ ਭਾਵਨਾ ਨਾਲ ਜੋੜਿਆ। ਪਵਿੱਤਰ ਸੂਤਰ ਦੀ ਵਾਚਨਾ ਰਾਹੀਂ ਧਰਮ ਦੇ ਗੂੜ੍ਹੇ ਸਿਧਾਂਤਾਂ ਨੂੰ ਸਮਝਣ ਅਤੇ ਉਨ੍ਹਾਂ ਨੂੰ ਆਪਣੇ ਰੋਜ਼ਾਨਾ ਜੀਵਨ ਵਿੱਚ ਅਮਲ ਵਿੱਚ ਲਿਆਉਣ ਦੀ ਪ੍ਰੇਰਣਾ ਦਿੱਤੀ ਗਈ।ਸਭਾ ਦੀ ਸਮਾਪਤੀ ਮੌਕੇ ਸੇਵਾ ਸਮਰਾਟ, ਉਪ-ਪ੍ਰਵਰਤਕ ਗੁਰਦੇਵ ਸ੍ਰੀ ਪੰਕਜ ਮੁਨੀ ਜੀ ਮਹਾਰਾਜ ਨੇ ਸਮੂਹ ਸ਼ਰਧਾਲੂਆਂ ਨੂੰ ਮੰਗਲ ਪਾਠ ਪ੍ਰਦਾਨ ਕੀਤਾ।

ਫੋਟੋ :3 ਪ੍ਰਵਚਨ ਕਰਦੇ ਜੈਨ ਸੰਤ ਅਤੇ ਹਾਜ਼ਰ ਸ਼ਰਧਾਲੂ।