ਸੰਦਾਂ ਦੀ ਕੋਈ ਜਵਾਬਦੇਹੀ ਨੇ ਹੋਣ ਕਾਰਨ ਕਿਸਾਨਾਂ ਵਿੱਚ ਭਾਰੀ ਰੋਸ
ਭੀਖੀ,19 ਅਪ੍ਰੈਲ (ਕਰਨ ਸਿੰਘ ) ਕੋਆਪਰੇਟਿਵ ਸੋਸਾਇਟੀ ਭੀਖੀ ਵਿੱਚ ਕਿਸਾਨਾਂ ਦੇ ਵਰਤੋਂ ਲਈ  ਖਰੀਦੇ ਗਏ ਖੇਤੀਬਾੜੀ ਸੰਦ ਸੁਸਾਇਟੀ ਵਿੱਚ ਮੌਜੂਦ ਨਾ ਹੋਣ ਕਾਰਨ ਕਿਸਾਨਾਂ ਵਿੱਚ ਕਾਫੀ ਰੋਸ ਪਾਇਆ ਜਾ ਰਿਹਾ ਹੈ। ਅੱਜ ਸੋਸਾਇਟੀ ਵਿਖੇ ਇਕੱਠੇ ਹੋਏ ਕਿਸਾਨਾਂ ਨੇ ਦੱਸਿਆ ਕਿ ਫਸਲ ਬੀਜਣ ਅਤੇ ਖੇਤ ਦੇ ਹੋਰ ਕੰਮਾਂ ਲਈ ਸੋਸਾਇਟੀ ਵਲੋਂ ਖੇਤੀਬਾੜੀ ਦੇ ਸੰਦ ਖਰੀਦੇ ਹੋਏ ਹਨ ਅਤੇ ਲੋੜ ਪੈਣ ਤੇ ਇਹ ਸੰਦ ਕਿਸਾਨਾਂ ਨੂੰ ਕਿਰਾਏ ਤੇ ਦਿੱਤੇ ਜਾਂਦੇ ਹਨ। ਉਨ੍ਹਾਂ ਦਸਿਆ ਕਿ ਉਹ ਕਈ ਦਿਨਾਂ ਤੋਂ ਸੰਦ ਲੈਣ ਲਈ ਸੁਸਾਇਟੀ ਦੇ ਚੱਕਰ ਲਗਾ ਰਹੇ ਹਨ ਪ੍ਰੰਤੂ ਏਥੇ ਸੰਦ ਮੌਜੂਦ ਹੀ ਨਹੀਂ ਹਨ ਅਤੇ ਜਦੋਂ ਸਬੰਧਤ ਅਧਿਕਾਰੀਆਂ ਨੂੰ ਇਸ ਬਾਰੇ ਪੁਛਿਆ ਗਿਆ ਤਾਂ ਉਨ੍ਹਾਂ ਵਲੋਂ ਕੋਈ ਢੁਕਵਾਂ ਜਵਾਬ ਨਹੀਂ ਦਿੱਤਾ ਗਿਆ।  ਕਿਸਾਨ ਹਰਦੀਪ ਸਿੰਘ ਨੇ ਦੱਸਿਆ ਕਿ ਜਦੋਂ ਉਹ ਸੁਸਾਇਟੀ ਵਿੱਚ ਖੇਤੀਬਾੜੀ ਦੇ ਸੰਦ ਲੈਣ ਆਏ ਤਾਂ ਓਥੇ ਕੋਈ ਵੀ ਸੰਦ ਮੌਜੂਦ ਨਹੀਂ ਸੀ ਅਤੇ ਜਦੋਂ ਉਨ੍ਹਾਂ ਸੋਸਾਇਟੀ ਦੇ ਸਕੱਤਰ ਨੂੰ ਇਸ ਸਬੰਧੀ ਪੁਛਿਆ ਤਾਂ ਉਨ੍ਹਾਂ ਨੇ ਕੋਈ ਠੋਸ ਜਵਾਬ ਦੇਣ ਦੀ ਬਜਾਏ ਕਿਹਾ ਕਿ ਸੰਦਾਂ ਦੀ ਜਾਣਕਾਰੀ ਉਨ੍ਹਾਂ ਕੋਲ ਨਹੀਂ ਹੈ। ਉਨ੍ਹਾਂ ਦਸਿਆ ਕਿ ਸੁਸਾਇਟੀ ਦੇ ਪ੍ਰਧਾਨ ਅਤੇ ਮੈਂਬਰਾਂ ਨਾਲ ਵੀ ਉਨ੍ਹਾਂ ਵਲੋਂ ਗੱਲ ਕੀਤੀ ਗਈ ਪ੍ਰੰਤੂ ਉਨ੍ਹਾਂ ਨੇ ਵੀ ਸੰਦ ਸੁਸਾਇਟੀ ਵਿੱਚ ਮੌਜੂਦ ਨਾ ਹੋਣ ਬਾਰੇ ਕਿਹਾ। ਉਨ੍ਹਾਂ ਜਦੋਂ ਪੁਛਿਆ ਕਿ ਇਹ ਸੰਦ ਕਿਸਨੂੰ ਦਿੱਤੇ ਗਏ ਹਨ ਉਸ ਦਾ ਰਿਕਾਰਡ ਜਾਂ ਕਿੰਨੇ ਕਿਰਾਏ ਤੇ ਦਿੱਤੇ ਗਏ ਹਨ, ਸਬੰਧੀ ਪੁਛਿਆ ਗਿਆ ਤਾਂ ਉਨ੍ਹਾਂ ਨੂੰ ਕੋਈ ਜਵਾਬ ਨਹੀਂ ਮਿਲਿਆ। ਉਨ੍ਹਾਂ ਕਿਹਾ ਕਿ ਜੇਕਰ ਇਸਦੀ ਜਾਂਚ ਕਰਵਾਈ ਜਾਵੇ ਤਾਂ ਕੋਈ ਵੱਡਾ ਘਪਲਾ ਵੀ ਸਾਹਮਣੇ ਆ ਸਕਦਾ ਹੈ। ਕਿਸਾਨ ਹਰਦੇਵ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਉਲਟਾਵੇਂ ਹਲਾਂ ਦੀ ਜਰੂਰਤ ਸੀ ਅਤੇ ਦੋ ਦਿਨ ਤੋਂ ਸੋਸਾਇਟੀ ਦੇ ਚੱਕਰ ਲਗਾ ਰਹੇ ਹਨ ਪ੍ਰੰਤੂ ਸੋਸਾਇਟੀ ਨੂੰ ਜਿੰਦਾ ਲੱਗਾ ਹੋਇਆ ਹੈ ਅਤੇ ਜਦੋਂ ਸੋਸਾਇਟੀ ਸਕੱਤਰ ਅਤੇ ਮੈਂਬਰਾਂ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਵਲੋਂ ਵੀ ਸੰਦ ਦੇਣ ਤੋਂ ਟਾਲ ਮਟੋਲ ਕੀਤਾ ਗਿਆ ਅਤੇ 2-3 ਦਿਨਾਂ ਵਿਚ ਸੋਸਾਇਟੀ ਵਿਚ ਸੰਦ ਹਾਜਰ ਕਰਨ ਦੀ ਗੱਲ ਕਹੀ ਗਈ। ਉਨ੍ਹਾਂ ਮੰਗ ਕੀਤੀ ਕਿਸਾਨਾਂ ਦੀ ਸਹੂਲਤ ਲਈ ਖਰੀਦੇ ਗਏ ਸੰਦਾਂ ਨੂੰ ਸੋਸਾਇਟੀ ਵਿੱਚ ਪੂਰਾ ਕੀਤਾ ਜਾਵੇ ਅਤੇ ਲੋੜ ਪੈਣ ਤੇ ਓਹ ਕਿਸਾਨਾਂ ਨੂੰ ਦਿੱਤੇ ਜਾਣ। ਇਸ ਮੌਕੇ  ਲੀਲਾ ਸਿੰਘ ਮਿਰਗ, ਚਰਨਜੀਤ ਭੱਠਲ, ਸਵਰਨ ਸਿੰਘ, ਕਾਲਾ ਸਿੰਘ, ਗੁਰਤੇਜ ਸਿੰਘ, ਅਕਬਰ ਖਾਨ, ਭੋਲਾ ਸਿੰਘ ਤੋਂ ਇਲਾਵਾ ਵੱਡੀ ਗਿਣਤੀ ਵਿਚ ਕਿਸਾਨ ਮੌਜੂਦ ਸਨ। ਜਦੋਂ ਇਸ ਸਬੰਧੀ ਸੋਸਾਇਟੀ ਦੇ ਸਕੱਤਰ ਗਗਨਦੀਪ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਸੰਦਾਂ ਸਬੰਧੀ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ ਹੈ। ਸੋਸਾਇਟੀ ਵਿੱਚ ਸਟਾਫ਼ ਘੱਟ ਹੋਣ ਕਾਰਨ ਸੰਦਾਂ ਦਾ ਲੈਣ ਦੇਣ ਸੋਸਾਇਟੀ ਦੇ ਮੈਂਬਰਾਂ ਵਲੋਂ ਕੀਤਾ ਜਾਂਦਾ ਹੈ ਅਤੇ ਉਹ ਹੀ ਇਸ ਬਾਰੇ ਦੱਸ ਸਕਦੇ ਹਨ। ਜਦੋਂ ਇਸ ਸਬੰਧੀ ਸੋਸਾਇਟੀ ਦੇ ਪ੍ਰਧਾਨ ਰਾਜਪ੍ਰੀਤ ਸਿੰਘ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਮਤਾ ਪਾਕੇ ਇਕ ਸਬ ਕਮੇਟੀ ਬਣਾਈ ਗਈ ਸੀ ਅਤੇ ਉਸ ਸਬ ਕਮੇਟੀ ਨੂੰ ਇੰਨਾ ਸੰਦਾਂ ਦੀ ਜਿੰਮੇਵਾਰੀ ਸੌਂਪੀ ਗਈ ਸੀ ਅਤੇ ਸਬ ਕਮੇਟੀ ਦੇ ਮੈਂਬਰ ਹੀ ਸੰਦਾਂ ਬਾਰੇ ਜਾਣਕਾਰੀ ਦੇ ਸਕਦੇ ਹਨ।