ਸ਼ਾਹੀ ਇਮਾਮ ਮੋਲਾਨਾ ਉਸਮਾਨ ਰਹਿਮਾਨੀ ਲੁਧਿਆਣਵੀ ਨੇ ਕੀਤੀ ਸ਼ਿਰਕਤ,
ਸਭ ਧਰਮਾਂ ਦੇ ਲੋਕਾਂ ਨੇ ਲਵਾਈ ਹਾਜ਼ਰੀ
ਭੀਖੀ, 5 ਅਗਸਤ (ਕਰਨ ਸਿੰਘ ਭੀਖੀ)
ਸਥਾਨਕ ਵਾਰਡ ਨੰ: 7 ਦੀ ਮਸਜਿਦ ਵਿਖੇ ਸਮੂਹ ਨਗਰ ਅਤੇ ਇਲਾਕਾ ਨਿਵਾਸੀ ਮੁਸਲਿਮ ਭਾਈਚਾਰੇ ਵੱਲੋਂ ਸਰਬ ਧਰਮ ਸੰਮੇਲਨ ਕਰਵਾਇਆ ਗਿਆ। ਜਿਸ ਵਿੱਚ ਪੰਜਾਬ ਦੇ ਮੁਸਲਿਮ ਆਗੂ ਸ਼ਾਹੀ ਇਮਾਮ ਮੋਲਾਨਾ ਉਸਮਾਨ ਰਹਿਮਾਨੀ ਲੁਧਿਆਣਵੀ ਵੱਲੋਂ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ ਗਈ।
ਸੰਮੇਲਨ ਦੌਰਾਨ ਸੰਬੋਧਨ ਕਰਦਿਆਂ ਸ਼ਾਹੀ ਇਮਾਮ ਨੇ ਕਿਹਾ ਕਿ ਕੁਝ ਲੋਕ ਧਰਮ ਦੇ ਨਾਮ ’ਤੇ ਸਾਡੇ ਵਿੱਚ ਵੰਡੀਆਂ ਪਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਫਿਰਕਾਪ੍ਰਸਤੀ ਲੋਕ ਇਨਸਾਨੀਅਤ ਵਿੱਚ ਜ਼ਹਿਰ ਘੋਲ ਕੇ ਆਪਣੀ ਸੱਤਾ ਨੂੰ ਕਾਇਮ ਰੱਖਣਾ ਚਾਹੁੰਦੇ ਹਨ। ਉਹਨਾਂ ਕਿਹਾ ਸਭ ਲੋਕ ਉਸ ਮਾਲਿਕ ਦੇ ਹੀ ਬੰਦੇ ਹਨ, ਕੋਈ ਵੀ ਊਚ-ਨੀਚ ਨਹੀਂ, ਮਾਲਿਕ ਨੇ ਸਭ ਨੂੰ ਬਰਾਬਰਤਾ ਦਾ ਹੱਕ ਦਿੱਤਾ ਹੈ, ਕਿਸੇ ਦਾ ਹੱਕ ਖਾਣਾ ਚੰਗੇ ਮਨੁੱਖ ਦੀ ਨਿਸ਼ਾਨੀ ਨਹੀਂ, ਉਹਨਾਂ ਕਿਹਾ ਕਿ ਸਭ ਧਰਮ ਏਕ ਹਨ, ਸਾਨੂੰ ਸਭ ਨੂੰ ਹਰ ਇੱਕ ਦਾ ਸਤਿਕਾਰ ਕਰਨਾ ਚਾਹੀਦਾ ਹੈ, ਐਸਾ ਕੋਈ ਵੀ ਧਰਮ ਨਹੀਂ ਜੋ ਲੜਨ ਲਈ ਕਹਿੰਦਾ ਹੋਵੇ। ਸ਼ਾਹੀ ਇਮਾਮ ਲੁਧਿਆਣਵੀ ਵੱਲੋਂ ਲਾਲਾ ਦੌਲਤ ਰਾਮ ਪਾਰਕ ਵਿੱਚ ਇੱਕ ਪੌਦਾ ਲਗਾਇਆ ਗਿਆ।
ਇਸ ਸਮੇਂ ਸ਼ਾਹੀ ਇਮਾਮ ਵੱਲੋਂ ਡਾ. ਸੁਲਤਾਨ ਸ਼ਾਹ ਨੂੰ ਮਜਲਿਸ ਅਹਿਰਾਰ ਇਸਲਾਮ ਹਿੰਦ ਦਾ ਜ਼ਿਲ੍ਹਾ ਪ੍ਰਧਾਨ ਅਤੇ ਫਿਰੋਜ਼ ਖਾਨ ਨੂੰ ਉਪ ਪ੍ਰਧਾਨ ਨਿਯੁਕਤ ਕੀਤਾ ਗਿਆ।
ਇਸ ਮੌਕੇ ਸ੍ਰੋਮਣੀ ਅਕਾਲੀ ਫਤਹਿ ਦੇ ਆਗੂ ਸੁਖਚੈਨ ਸਿੰਘ ਅਤਲਾ, ਕਾਂਗਰਸੀ ਆਗੂ ਜੱਸੀ ਸਮਾਓਂ, ਹੰਸ ਰਾਜ ਮੋਫਰ, ਬਾਰੂ ਖਾਨ, ਜੱਗੀ, ਫਿਰੋਜਦੀਨ, ਮਿੱਠੂ ਖਾਂ, ਅਬਦੁਲ, ਸਰਦਾਰ ਅਲੀ, ਮੌਲਵੀ ਮਕਸੂਦ, ਕਾਮਰਾਨ ਆਦਿ ਹਾਜਰ ਸਨ।
