ਜ਼ਿਲ੍ਹਾ ਖ਼ਜ਼ਾਨਾ ਦਫ਼ਤਰ ਬਠਿੰਡਾ ਵਿਖੇ ‘ਪੈਨਸ਼ਨ ਸੇਵਾ ਮੇਲੇ’ ਦਾ ਦੂਜਾ ਦਿਨ ਰਿਹਾ ਸਫਲ, ਪੈਨਸ਼ਨਰਾਂ ਨੂੰ 21 ਨਵੰਬਰ ਨੂੰ ਵੀ ਲਾਭ ਉਠਾਉਣ ਦੀ ਅਪੀਲ
ਨਾਨਕ ਸਿੰਘ ਖੁਰਮੀ,ਬਠਿੰਡਾ 20 ਨਵੰਬਰ
ਪੰਜਾਬ ਸਰਕਾਰ ਦੇ ਵਿੱਤ ਵਿਭਾਗ ਵੱਲੋਂ ਸਮੂਹ ਸਰਕਾਰੀ ਵਿਭਾਗਾਂ ਤੋਂ ਸੇਵਾ ਮੁਕਤ ਪੈਨਸ਼ਨਰਾਂ ਅਤੇ ਫੈਮਿਲੀ ਪੈਨਸ਼ਨਰਾਂ ਦੀ ਸਹੂਲਤ ਲਈ ਲਾਗੂ ਕੀਤੇ ਗਏ ‘ਪੈਨਸ਼ਨ ਸੇਵਾ ਪੋਰਟਲ’ ਦਾ ਵੱਧ ਤੋਂ ਵੱਧ ਲਾਭ ਪੈਨਸ਼ਨਰਾਂ ਤੱਕ ਪਹੁੰਚਾਉਣ ਦੇ ਉਦੇਸ਼ ਨਾਲ ਜ਼ਿਲ੍ਹਾ ਖ਼ਜ਼ਾਨਾ ਦਫ਼ਤਰ, ਬਠਿੰਡਾ ਵਿਖੇ 19 ਤੋਂ 21 ਨਵੰਬਰ 2026 ਤੱਕ ਤਿੰਨ ਰੋਜ਼ਾ ‘ਪੈਨਸ਼ਨ ਸੇਵਾ ਮੇਲੇ’ ਦਾ ਦੂਜਾ ਪੜਾਅ ਮਨਾਇਆ ਜਾ ਰਿਹਾ ਹੈ। ਇਸ ਤਹਿਤ ਅੱਜ 20 ਨਵੰਬਰ ਨੂੰ ਮੇਲੇ ਦੇ ਦੂਜਾ ਦਿਨ ਦਾ ਆਯੋਜਨ ਬੇਹੱਦ ਸਫਲ ਰਿਹਾ। ਅੱਜ ਪੈਨਸ਼ਨਰ ਮੇਲੇ ਦੇ ਦੂਜੇ ਦਿਨ ਵਿੱਤ ਵਿਭਾਗ ਦੇ ਅਡੀਸ਼ਨਲ ਡਾਇਰੈਕਟਰ ਮੈਡਮ ਸ਼੍ਰੀਮਤੀ ਸਿਮਰਜੀਤ ਕੌਰ ਵਿਸੇਸ਼ ਤੌਰ ‘ਤੇ ਬਠਿੰਡਾ ਵਿਖੇ ਪਹੁੰਚੇ। ਉਹਨਾਂ ਪੈਨਸ਼ਨਰਾਂ ਅਤੇ ਫੈਮਿਲੀ ਪੈਨਸ਼ਨਰਾਂ ਦੀ ਈ-ਕੇ.ਵਾਈ.ਸੀ. ਦੀ ਸਹੂਲਤ ਸਬੰਧੀ ਲਗਾਏ ਪੈਨਸ਼ਨਰ ਮੇਲੇ ਦੇ ਕੰਮ ਦਾ ਜਾਇਜ਼ਾ ਲਿਆ ਅਤੇ ਪੈਨਸ਼ਨਰਾਂ ਨਾਲ ਗੱਲਬਾਤ ਕੀਤੀ।ਉਹਨਾਂ ਕਿਹਾ ਕਿ ਜਿਹੜੇ ਪੈਨਸ਼ਨਰ ਹਾਲੇ ਤੱਕ ਈ-ਕੇ.ਵਾਈ.ਸੀ. (e-KYC) ਤੋਂ ਵਾਂਝੇ ਰਹਿ ਗਏ ਸਨ, ਵਿੱਤ ਵਿਭਾਗ ਵੱਲੋਂ ਉਨ੍ਹਾਂ ਨੂੰ ਈ-ਕੇ.ਵਾਈ.ਸੀ. ਕਰਵਾਉਣ ਲਈ ਇਹ ਆਖ਼ਰੀ ਮੌਕਾ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਮੇਲੇ ਵਿੱਚ ਡਿਜੀਟਲ ਲਾਈਫ ਸਰਟੀਫਿਕੇਟ (Digital Life Certificate) ਅਤੇ ਪੈਨਸ਼ਨਰਾਂ ਨਾਲ ਸਬੰਧਤ ਕਿਸੇ ਵੀ ਤਰ੍ਹਾਂ ਦੀ ਸਮੱਸਿਆ ਦਾ ਮੌਕੇ ‘ਤੇ ਹੀ ਹੱਲ ਕੀਤਾ ਜਾ ਰਿਹਾ ਹੈ। ਜ਼ਿਲ੍ਹਾ ਖ਼ਜ਼ਾਨਾ ਅਫ਼ਸਰ ਸ੍ਰੀ ਮਹੇਸ ਕੁਮਾਰ ਨੇ ਜ਼ਿਲ੍ਹੇ ਦੇ ਸਮੂਹ ਰਹਿੰਦੇ ਪੈਨਸ਼ਨਰਾਂ ਨੂੰ ਅਪੀਲ ਕੀਤੀ ਕਿ ਉਹ 21 ਨਵੰਬਰ 2026 ਨੂੰ ਪੈਨਸ਼ਨਰ ਆਪਣੇ ਨਾਲ ਪੀ.ਪੀ.ਓ. ਦੀ ਕਾਪੀ, ਆਧਾਰ ਕਾਰਡ, ਬੈਂਕ ਪਾਸ ਬੁੱਕ ਅਤੇ ਆਧਾਰ ਕਾਰਡ ਨਾਲ ਲਿੰਕਡ ਮੋਬਾਈਲ ਫ਼ੋਨ ਜ਼ਰੂਰ ਲੈ ਕੇ ਸਵੇਰੇ 9 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਜ਼ਿਲ੍ਹਾ ਖ਼ਜ਼ਾਨਾ ਦਫ਼ਤਰ, ਬਠਿੰਡਾ ਤੋਂ ਇਲਾਵਾ ਖ਼ਜ਼ਾਨਾ ਦਫ਼ਤਰ ਤਲਵੰਡੀ ਸਾਬੋ, ਨਥਾਣਾ ਤੇ ਫੂਲ ਵਿਖੇ ਲਗਾਏ ਜਾ ਰਹੇ ਇਸ ਪੈਨਸ਼ਨ ਸੇਵਾ ਮੇਲੇ ਵਿੱਚ ਪਹੁੰਚ ਕੇ ਆਪਣੀ ਈ-ਕੇ.ਵਾਈ.ਸੀ. ਅਤੇ ਡਿਜੀਟਲ ਲਾਈਫ ਸਰਟੀਫਿਕੇਟ ਜ਼ਰੂਰ ਅਪਲੋਡ ਕਰਵਾਉਣ ਅਤੇ ਸਰਕਾਰ ਦੇ ਇਸ ਉਪਰਾਲੇ ਦਾ ਵੱਧ ਤੋਂ ਵੱਧ ਲਾਭ ਉਠਾਉਣ।
