ਉਠ ਸਵੇਰੇ
ਬਣਾ ਰੋਟੀਆਂ
ਸਾਈਕਲ ਤੇ ਡੱਬਾ ਟੰਗ ਦਿੰਦੀ ਏ।
ਚੱਲ ਪੈਂਦਾ ਹਾਂ
ਸ਼ਹਿਰ ਵੱਲ ਨੂੰ
ਕਾਸ਼!ਮਿਲ ਜਾਵੇ ਅੱਜ ਮਜ਼ਦੂਰੀ
ਲੈ ਆਵਾਂ ਚਾਹ ਗੁੜ ਜੋਗਾ ਖਰਚਾ
ਮੁੱਕੀ ਪਈ ਏ ਖੰਡ ਵੀ
ਕਈ ਦਿਨਾਂ ਦੀ
ਮਨਰੇਗਾ ਵੀ ਬੰਦ ਪਈ
ਨਹੀਂ ਕੁਝ ਨਾ ਕੁਝ ਤਾਂ
ਉਹ ਵੀ ਕਰਦੀ
ਘਰ ਮੇਰੇ ਨੂੰ ਚਲਾਉਣ ਲਈ।
ਸੁੱਖ ਨਾਲ ਵੱਡੀ
ਦਸਵੀਂ ਕਰਗੀ
ਔਖੀ ਏ ਪੜਾਈ ਵੀ ਉਸਦੀ
ਕਹਿੰਦੀ ਬਾਪੂ
ਰਜਿਸਟਰ ਲਿਆ ਦੇਵੀ
ਪੈਨ ਵੀ ਮੁੱਕ ਗਏ ਪੁੜਾ ਮੰਗਵਾ ਦੀ।
ਮੁੰਡਾ ਵੀ ਹੁਣ
ਜਿੱਦ ਪਿਆ ਕਰਦਾ
ਬਸਤਾ ਵੀ ਹੁਣ ਪਾਟਿਆ ਪਿਆ ਏ
ਪਾਟੇ ਨਾਲ ਨਹੀਂ ਹੁਣ ਸਰਦਾ
ਡਿੱਗ ਪੈਂਦੀਆਂ ਨੇ
ਮੇਰੀਆਂ ਕਾਪੀਆਂ ਕਿਤਾਬਾਂ
ਬਸਤੇ ਬਿਨਾ ਨਹੀਂ ਮੇਰਾ ਸਰਦਾ।
ਕਣਕ ਵੀ ਪੂਰੇ ਸਾਲ ਦੀ
ਲੈਣੀ ਏ ਅਜੇ
ਕਾਸ਼! ਮਿਲ ਜਾਵੇ ਕੋਈ ਕਰਜਾ।
ਸੋਚਦਾ-ਸੋਚਦਾ ਮੰਡੀ ਆ ਜਾਂਦਾ
ਮਿਲ ਜਾਵੇ ਅੱਜ ਇਕੱਠਾ ਕੰਮ
ਬੱਚਿਆਂ ਦੇ ਉਲਾਂਭੇ ਲਾਵਾਂ
ਲੈ ਜਾਵਾਂ ਇੱਕ ਚੱਪਲਾਂ ਦਾ ਜੋੜਾ
ਮਾਂ ਵਿਚਾਰੀ ਟੁੱਟੀਆਂ
ਪਾਈ ਫਿਰਦੀ ਏ
ਬਾਪੂ ਲਈ ਵੀ ਸੂਟ ਸੁਣਾਵਾਂ
ਲਾ ਲਵਾਂ ਕਦੇ
ਮੈਂ ਵੀ ਪੈਗ ਘਰ ਜਾ ਕੇ
ਕਈ ਦਿਨਾਂ ਤੋਂ ਪਿਆ ਲਲਚਾਵਾ।
ਤੰਗੀਆਂ ਤੁਰਸ਼ੀਆਂ ਵਿੱਚ
ਚੱਲਦੀ ਪਈ ਏ ਜਿੰਦਗੀ
ਫਿਰ ਵੀ ਗੀਤ ਖੁਸ਼ੀ ਦੇ ਗਾਵਾਂ
ਮਜ਼ਦੂਰ ਹਾਂ ਕਰਦਾ ਹਾਂ ਮਜ਼ਦੂਰੀ
ਕਾਹਦੇ ਮਜ਼ਦੂਰ ਦਿਵਸ ਮਨਾਵਾਂ ।
ਅਸਾਂ ਤਾਂ ਰੋਜ਼
ਕਮਾਉਣਾ ਤੇ ਖਾਣਾ
ਜ਼ਿੰਦਗੀ ਨੇ ਤਾਂ ਚਲਦੇ ਜਾਣਾ
ਦਿਲ ਦੀ ਗੱਲ ਸੁਣਾ ਜਾਂਦਾ ਹਾਂ
ਮਜ਼ਦੂਰ ਹਾਂ
ਕਰਦਾ ਹਾਂ ਮਜਦੂਰੀ।
ਅਮਨਦੀਪ ਸ਼ਰਮਾ ਗੁਰਨੇ ਕਲਾਂ
ਤਹਿਸੀਲ ਬੁਢਲਾਡਾ ਜ਼ਿਲ੍ਹਾ ਮਾਨਸਾ।
9876074055
