4 ਅਪ੍ਰੈਲ (ਗਗਨਦੀਪ ਸਿੰਘ) ਭਗਤਾ ਭਾਈ: ਪੰਜਾਬ ਗੌਰਮਿੰਟ ਪੈਨਸ਼ਨਰਜ਼ ਐਸੋਸ਼ੀਏਸ਼ਨ ਬਲਾਕ ਭਗਤਾ ਭਾਈ ਕਾ ਦੀ ਮਾਸਿਕ ਇਕੱਤਰਤਾ ਨਰੇਗਾ ਭਵਨ ਭਗਤਾ ਭਾਈ ਵਿਖੇ ਪ੍ਰਧਾਨ ਮਾਸਟਰ ਆਤਮ ਤੇਜ ਸ਼ਰਮਾ ਦੀ ਪ੍ਰਧਾਨਗੀ ਹੇਠ ਹੋਈ ਜਿਸ ਵਿਚ ਪੈਨਸ਼ਨਰਾਂ ਨੇ ਭਰਵੀਂ ਸ਼ਮੂਲੀਅਤ ਕੀਤੀ। ਆਰੰਭ ਵਿਚ ਬਲਾਕ ਭਗਤਾ ਭਾਈ ਕਾ ਦੀਆਂ ਪਿਛਲੇ ਦਿਨੀਂ ਵਿਛੜੀਆਂ ਪੈਨਸ਼ਨਰ ਸਖ਼ਸ਼ੀਅਤਾਂ — ਬੀਬੀ ਮਲਕੀਤ ਕੌਰ ਅਧਿਆਪਕਾ ਸਿਰੀਏਵਾਲਾ , ਮਾਸਟਰ ਦਰਸ਼ਨ ਸਿੰਘ ਕੋਇਰ ਸਿੰਘ ਵਾਲਾ ਅਤੇ ਸੰਜੀਵ ਕੁਮਾਰ ਭਗਤਾ ਭਾਈ ਸਪੁੱਤਰ ਸਵ. ਬਾਬੂ ਓਮ ਪ੍ਰਕਾਸ਼ ਸਿੱਖਿਆ ਵਿਭਾਗ ਨੂੰ ਦੋ ਮਿੰਟ ਦਾ ਮੋਨ ਰੱਖ ਕੇ ਸ਼ਰਧਾਂਜਲੀ ਦਿੱਤੀ ਗਈ। ਪ੍ਰੋਗਰਾਮ ਦਾ ਆਰੰਭ ਕਰਦਿਆਂ ਗੁਰਜੀਤ ਸਿੰਘ ਭਗਤਾ ਭਾਈ ਸੇਵਾ ਮੁਕਤ ਸਮਾਜਿਕ ਸਿੱਖਿਆ ਤੇ ਪੰਚਾਇਤ ਅਫ਼ਸਰ ਨੇ ਸਮੂਹ ਪੈਨਸ਼ਨਰਾਂ ਨੂੰ ਜਿੱਥੇ ਇਹ ਅਪੀਲ ਕੀਤੀ ਕਿ ਪੰਜਾਬ ਨੈਸ਼ਨਲ ਬੈਂਕ ਨਾਲ ਸਬੰਧਿਤ ਪੈਨਸ਼ਨਰ ਦੋ ਸਾਲ ਬਾਅਦ ਬੇਸਿਕ ਪੈਨਸ਼ਨ ਵਜੋਂ ਮਿਲਣ ਵਾਲਾ ਐਲ.ਟੀ.ਸੀ. ਲੈਣ ਲਈ ਪੈਨਸ਼ਨ ਪੋਰਟਲ ‘ਤੇ ਐਪਲਾਈ ਕਰਨਾ ਯਕੀਨੀ ਬਣਾਉਣ, ਉੱਥੇ ਨਾਲ ਹੀ ਉਨ੍ਹਾਂ ਸਰਕਾਰ ਵੱਲੋਂ ਬਣਾਈ ਗਈ ਪੈਨਸ਼ਨ ਪੋਰਟਲ ਸਬੰਧੀ ਇਸ ਪਾਲਿਸੀ ਦੀ ਨਿਖੇਧੀ ਕਰਦਿਆਂ ਦੱਸਿਆ ਕਿ ਅਜਿਹੇ ਪੋਰਟਲ ਤਿਆਰ ਕਰਕੇ ਸਰਕਾਰ ਪੈਨਸ਼ਨਰਾਂ ਨੂੰ ਪੈਨਸ਼ਨ ਤੋਂ ਵਿਰਵੇ ਕਰਨ ਲਈ ਹਥ-ਕੰਡੇ ਅਪਣਾ ਰਹੀ ਹੈ। ਉਨ੍ਹਾਂ ਜੁਲਾਈ ਮਹੀਨੇ ਤੱਕ ਇਨਕਮ ਟੈਕਸ ਦੀਆਂ ਰਿਟਰਨਾਂ ਭਰਨ ਲਈ ਵੀ ਪੈਨਸ਼ਨਰਾਂ ਨੂੰ ਜਾਗਰੂਕ ਕੀਤਾ। ਭਾਈ ਕੌਰ ਸਿੰਘ ਕੋਠਾ ਗੁਰੂ ਨੇ ਅੱਜ ਦੀ ਇਕੱਤਰਤਾ ਵਿਚ 80 ਸਾਲ ਦੀ ਉਮਰ ਪੂਰੀ ਕਰਨ ਵਾਲੀਆਂ ਸਖ਼ਸ਼ੀਅਤਾਂ — ਸਿਹਤ ਵਿਭਾਗ ਦੇ ਡਾਕਟਰ ਸੋਢੀ ਬਲਵਿੰਦਰ ਸਿੰਘ ਕੋਠਾ ਗੁਰੂ ਅਤੇ ਉਨ੍ਹਾਂ ਦੀ ਧਰਮ ਪਤਨੀ ਅਧਿਆਪਕਾ ਬੀਬੀ ਬਲਬੀਰ ਕੌਰ ਦੇ ਪਰਿਵਾਰਕ ਪਿਛੋਕੜ ਬਾਰੇ ਵਿਸਥਾਰ ਵਿਚ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਸੋਢੀ ਬਲਵਿੰਦਰ ਸਿੰਘ, ਮਹਾਰਾਜਾ ਰਣਜੀਤ ਸਿੰਘ ਦੇ ਅਹਿਲਕਾਰ/ਬਹਾਦਰ ਸਿਪਾਹੀ ਸੋਢੀ ਫੌਜਦਾਰ ਸਿੰਘ ਦੀ ਵੰਸ਼ ਵਿਚੋਂ ਹਨ ਜਿਨ੍ਹਾਂ ਨੂੰ ਜਿੱਥੇ ਮਹਾਰਾਜੇ ਵੱਲੋਂ 100 ਘੋੜ ਸਵਾਰ ਰੱਖਣ ਦਾ ਅਧਿਕਾਰ ਪ੍ਰਾਪਤ ਸੀ ਉੱਥੇ ਜਲੰਧਰ, ਹੁਸ਼ਿਆਰਪੁਰ ਜ਼ਿਲ੍ਹਿਆਂ ਵਿਚ ਕਈ ਪਿੰਡ ਜਾਗੀਰ ਵਿਚ ਦਿੱਤੇ ਗਏ ਸਨ। ਉਨ੍ਹਾਂ ਸੋਢੀ ਬਲਵਿੰਦਰ ਸਿੰਘ ਦੀ ਅਦੁੱਤੀ ਸਖ਼ਸ਼ੀਅਤ ਬਾਰੇ ਚਾਨਣਾ ਪਾਉਂਦਿਆਂ ਉਨ੍ਹਾਂ ਵੱਲੋਂ ਵੱਖ – ਵੱਖ ਸਭਾ ਸੋਸਾਇਟੀਆਂ, ਤਰਕਸ਼ੀਲ ਲਹਿਰ, ਕਰਮਚਾਰੀ ਯੂਨੀਅਨ ਅਤੇ ਸਾਹਿੱਤ ਵਿਚ ਪਾਏ ਗਏ ਯੋਗਦਾਨ ਦਾ ਵਿਸਥਾਰਿਤ ਜ਼ਿਕਰ ਕੀਤਾ। ਐਸੋਸੀਏਸ਼ਨ ਸਰਪ੍ਰਸਤ ਮਾਸਟਰ ਗੁਰਚਰਨ ਸਿੰਘ ਭਗਤਾ ਭਾਈ ਨੇ ਬਹੁਤ ਹੀ ਭਾਵਪੂਰਤ ਸ਼ਬਦਾਂ ਦ੍ਵਾਰਾ ਸੋਢੀ ਬਲਵਿੰਦਰ ਸਿੰਘ ਵੱਲੋਂ ਤਰਕਸ਼ੀਲ ਜੱਥੇਬੰਦੀ ਵਿਚ ਨਿਭਾਈ ਗਈ ਭੂਮਿਕਾ/ਸੇਵਾ ਦੀ ਪ੍ਰਸ਼ੰਸਾ ਕਰਦਿਆਂ ਦੱਸਿਆ ਕਿ ਵਾਸਤਵ ਵਿਚ ਸਿੱਖ ਧਰਮ ਦੀ ਨੀਂਵ ਹੀ ਤਰਕ ਆਧਾਰਿਤ ਹੈ। ਉਨ੍ਹਾਂ ਗੁਰਬਾਣੀ ਦੇ ਹਵਾਲਿਆਂ ਨਾਲ ਦੱਸਿਆ ਕਿ ਸਾਰੇ ਸਿੱਖ ਗੁਰੂ ਸਾਹਿਬਾਨ ਖ਼ੁਦ ਤਰਕਸ਼ੀਲ ਸੋਚ ਦੇ ਧਾਰਨੀ ਸਨ। ਐਸੋਸ਼ੀਏਸ਼ਨ ਪ੍ਰਧਾਨ ਮਾਸਟਰ ਆਤਮ ਤੇਜ ਸ਼ਰਮਾ ਕੋਠਾ ਗੁਰੂ ਨੇ ਸਨਮਾਨਿਤ ਹੋਣ ਜਾ ਰਹੀਆਂ ਸਖ਼ਸ਼ੀਅਤਾਂ ਦੀ ਨਿਮ੍ਰਤਾ,ਤਨ ਦੇਹੀ/ਈਮਾਨਦਾਰੀ ਨਾਲ ਨਿਭਾਈ ਗਈ ਸਰਕਾਰੀ ਸੇਵਾ ਦੇ ਜ਼ਿਕਰ ਤੋਂ ਇਲਾਵਾ ਇਹ ਵੀ ਦੱਸਿਆ ਕਿ ਸੋਢੀ ਬਲਵਿੰਦਰ ਸਿੰਘ ਪੈਨਸ਼ਨਰ ਐਸੋਸ਼ੀਏਸ਼ਨ ਭਗਤਾ ਭਾਈ ਦੇ ਸਲਾਹਕਾਰ ਵਜੋਂ ਵੀ ਐਸੋਸ਼ੀਏਸ਼ਨ ਨੂੰ ਯੋਗ ਅਗਵਾਈ ਦੇ ਰਹੇ ਹਨ। ਮਾਸਟਰ ਜੀ ਨੇ ਦੋਨੋਂ ਸਨਮਾਨਿਤ ਸਖ਼ਸ਼ੀਅਤਾਂ ਦੀ ਲੰਬੀ ਆਯੂ ਦੀ ਵੀ ਕਾਮਨਾ ਕੀਤੀ। ਮਾਸਟਰ ਲਾਭ ਸਿੰਘ ਡੋਡ ਨੇ ਦੇਸ਼ ਦੀ ਨਾਜ਼ੁਕ ਅਵਸਥਾ ਨੂੰ ਬਿਆਨ ਕਰਦੀ ਆਪਣੀ ਕਾਵਿ ਰਚਨਾ ਦ੍ਵਾਰਾ ਹਾਜ਼ਿਰੀ ਲਵਾਈ। ਉਪਰੰਤ ਸਨਮਾਨ ਦੀ ਰਸਮ ਅਦਾ ਕੀਤੀ ਗਈ। ਬੀਬੀ ਸੱਤਪਾਲ ਕੌਰ ਭਗਤਾ ਭਾਈ ਕਾ ਵੱਲੋਂ ਅਧਿਆਪਕਾ ਬੀਬੀ ਬਲਬੀਰ ਕੌਰ ਸੋਢੀ ਦਾ ਕੀਮਤੀ ਸ਼ਾਲ ਪਹਿਣਾ ਕੇ ਫੋਟੋ ਜੜਿਤ ਸੁੰਦਰ ਮੋਮੈਂਟੋ ਦ੍ਵਾਰਾ ਸਨਮਾਨ ਕੀਤਾ ਗਿਆ। ਇਨ੍ਹਾਂ ਤੋਂ ਬਾਅਦ ਸੋਢੀ ਬਲਵਿੰਦਰ ਸਿੰਘ ਦਾ ਸਰਪ੍ਰਸਤ ਮਾਸਟਰ ਗੁਰਚਰਨ ਸਿੰਘ, ਪ੍ਰਧਾਨ ਮਾਸਟਰ ਆਤਮ ਤੇਜ ਸ਼ਰਮਾ ਵੱਲੋਂ ਲੋਈ ਅਤੇ ਸੁੰਦਰ ਤਸਵੀਰ ਜੜਿਤ ਸਿਮ੍ਰਤੀ ਚਿੰਨ੍ਹ ਭੇਟ ਕਰਕੇ ਜੈਕਾਰਿਆਂ ਦੀ ਗੂੰਜ ਵਿਚ ਸਨਮਾਨ ਕੀਤਾ ਗਿਆ। ਭਾਈ ਕੌਰ ਸਿੰਘ ਵੱਲੋਂ ਰਸ਼ੀਅਨ ਨਾਵਲ ‘ਪਹਿਲਾ ਅਧਿਆਪਕ’, ਨੌਜਵਾਨ ਲੇਖਕ ਗਗਨਦੀਪ ਸਿੰਘ ਫੂਲ ਦੀ ਲਿਖੀ ਪੁਸਤਕ’ਜੀਵਨੀ ਅੰਬੇਦਕਰ’ ਅਤੇ ਸਿਕੰਦਰ ਮਾਨਵ ਚੰਦਭਾਨ ਦਾ ਕਾਵਿ ਸੰਗ੍ਰਹਿ ਆਦਿਕ ਪੁਸਤਕ ਸੋਢੀ ਸਾਹਿਬ ਨੂੰ ਭੇਟ ਕੀਤੇ ਗਏ। ਦੋਨੋਂ ਸਨਮਾਨਿਤ ਸਖ਼ਸ਼ੀਅਤਾਂ ਵੱਲੋਂ ਵੀ ਸਾਂਝੇ ਤੌਰ ਤੇ ਪੈਨਸ਼ਨਰ ਐਸੋਸ਼ੀਏਸ਼ਨ ਭਗਤਾ ਭਾਈ ਕਾ ਨੂੰ 10,000/- ਰੁਪਏ ਦੀ ਸਹਾਇਤਾ ਰਾਸ਼ੀ ਭੇਟ ਕੀਤੀ ਗਈ।ਇਸ ਸਮੇਂ ਸੋਢੀ ਬਲਵਿੰਦਰ ਸਿੰਘ ਨੇ ਸਾਰੇ ਹਾਜ਼ਰੀਨ ਦਾ ਬਹੁਤ – ਬਹੁਤ ਧੰਨਵਾਦ ਕਰਦਿਆਂ ਕਿਹਾ ਕਿ ਪੈਨਸ਼ਨਰ ਐਸੋਸ਼ੀਏਸ਼ਨ ਭਗਤਾ ਭਾਈ ਵੱਲੋਂ ਉਨ੍ਹਾਂ ਨੂੰ ਦਿੱਤਾ ਗਿਆ ਇਹ ਸਨਮਾਨ ਸਦੈਵ ਯਾਦ ਰਹੇਗਾ। ਸਮਾਗਮ ਵਿਚ ਪੁੱਜੇ ਪੈਨਸ਼ਨਰ ਸਾਥੀਆਂ ਵਿਚੋਂ — ਮਾਸਟਰ ਅਮਰਜੀਤ ਸਿੰਘ ਭਗਤਾ ਭਾਈ ਵਿੱਤ ਸਕੱਤਰ, ਮਾਸਟਰ ਨਛੱਤਰ ਸਿੰਘ, ਮਾਸਟਰ ਰਣਜੋਧ ਸਿੰਘ, ਮਾਸਟਰ ਗੁਰਦੀਪ ਸਿੰਘ, ਮਾਸਟਰ ਸੁਰਜੀਤ ਸਿੰਘ, ਬੂਟਾ ਸਿੰਘ, ਸੁਰਜਨ ਸਿੰਘ, ਪਟਵਾਰੀ ਦਰਸ਼ਨ ਸਿੰਘ, ਹਾਕਮ ਸਿੰਘ ਕੋਆਪਰੇਟਿਵ ਵਿਭਾਗ (ਸਾਰੇ ਭਗਤਾ ਭਾਈ), ਮਾਸਟਰ ਰੂਪ ਸਿੰਘ ਭੋਡੀ ਪੁਰਾ, ਮਾਸਟਰ ਕਰਨੈਲ ਸਿੰਘ, ਮਾਸਟਰ ਜੋਰਾ ਸਿੰਘ (ਦੋਵੇਂ ਬੁਰਜ ਥਰੋੜ), ਬਲਵਿੰਦਰ ਸਿੰਘ,ਤੇਜਾ ਸਿੰਘ, ਮਾਸਟਰ ਦਰਬਾਰਾ ਸਿੰਘ, ਮਾਸਟਰ ਸੁਰਜੀਤ ਸਿੰਘ (ਦੋਵੇਂ ਮਲੂਕਾ), ਮਾਸਟਰ ਨਛੱਤਰ ਸਿੰਘ ਮਾਨ, ਮਾਸਟਰ ਬੰਤਾ ਸਿੰਘ ਮਾਨ (ਦੋਨੋਂ ਕੋਠਾ ਗੁਰੂ) ਆਦਿਕ ਸਖ਼ਸ਼ੀਅਤਾਂ ਦੇ ਨਾਉਂ ਵਰਨਨ ਯੋਗ ਹਨ। ਉਪਰੰਤ ਅਨੇਕ ਤਰ੍ਹਾਂ ਦੇ ਮਿਸ਼ਟਾਨਾਂ ਸਮੇਤ ਚਾਹ ਪਾਰਟੀ ਕਰ ਕੇ ਸਮਾਗਮ ਦੀ ਸਮਾਪਤੀ ਕੀਤੀ ਗਈ।