ਮਹਿਲ ਕਲਾਂ, 20 ਮਾਰਚ (ਸਟਾਫ ਰਿਪੋਰਟਰ)
ਰਮਜ਼ਾਨ ਮੁਬਾਰਕ ਦੇ ਪਵਿੱਤਰ ਮਹੀਨੇ ਦੇ 30 ਰੋਜ਼ੇ ਪੂਰੇ ਹੋਣ ਉਪਰੰਤ 21 ਮਾਰਚ ਦਿਨ ਸ਼ਨੀਵਾਰ ਨੂੰ ਸਵੇਰੇ 9 ਵਜੇ ਈਦ-ਉਲ-ਫਿਤਰ ਦੀ ਨਮਾਜ਼ ਈਦਗਾਹ ਮਹਿਲ ਕਲਾਂ ਵਿਖੇ ਅਦਾ ਕੀਤੀ ਜਾਵੇਗੀ। ਮਸਜਿਦ ਦੇ ਮੌਲਵੀ ਕਾਰੀ ਅਜੂਬ ਖਾਨ ਵੱਲੋਂ ਇਹ ਨਮਾਜ਼ ਅਦਾ ਕਰਵਾਈ ਜਾਵੇਗੀ। ਇਸ ਮੌਕੇ ਪੂਰੇ ਦੇਸ਼ ਵਿੱਚ ਖੁਸ਼ੀਆਂ ਦਾ ਮਾਹੌਲ ਬਣਿਆ ਹੋਇਆ ਹੈ ਅਤੇ ਲੋਕ ਬੜੇ ਉਤਸ਼ਾਹ ਨਾਲ ਈਦ ਦਾ ਤਿਉਹਾਰ ਮਨਾਉਣ ਲਈ ਤਿਆਰ ਹਨ।
ਸਿਵਲ ਪ੍ਰੋਟੈਕਸ਼ਨ ਆਗੂ ਡਾ. ਮਿੱਠੂ ਮੁਹੰਮਦ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮਹਿਲ ਕਲਾਂ ਇਲਾਕੇ ਦੇ ਆਸ-ਪਾਸ ਲਗਭਗ 20 ਤੋਂ 25 ਪਿੰਡਾਂ ਦੇ ਮੁਸਲਿਮ ਭਾਈਚਾਰੇ ਦੇ ਲੋਕ ਮਹਿਲ ਕਲਾਂ ਦੀ ਈਦਗਾਹ ਵਿਖੇ ਇਕੱਠੇ ਹੋ ਕੇ ਈਦ-ਉਲ-ਫਿਤਰ ਦੀ ਨਮਾਜ਼ ਅਦਾ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਸ ਧਾਰਮਿਕ ਸਮਾਗਮ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਸ਼ਿਰਕਤ ਕਰਨਗੇ।
ਉਨ੍ਹਾਂ ਹੋਰ ਦੱਸਿਆ ਕਿ ਹਰ ਸਾਲ ਦੀ ਤਰ੍ਹਾਂ ਇਸ ਵਾਰ ਵੀ ਵੱਖ-ਵੱਖ ਧਾਰਮਿਕ, ਸਮਾਜਿਕ ਅਤੇ ਰਾਜਨੀਤਿਕ ਸੰਸਥਾਵਾਂ ਦੇ ਆਗੂ ਵੀ ਪਹੁੰਚ ਕੇ ਮੁਸਲਿਮ ਭਾਈਚਾਰੇ ਨੂੰ ਈਦ ਦੀਆਂ ਵਧਾਈਆਂ ਦੇਣਗੇ। ਖਾਸ ਗੱਲ ਇਹ ਹੈ ਕਿ ਇਸ ਸਮਾਗਮ ਵਿੱਚ ਹਿੰਦੂ, ਮੁਸਲਿਮ, ਸਿੱਖ ਅਤੇ ਇਸਾਈ ਭਾਈਚਾਰੇ ਦੇ ਲੋਕ ਭਰਪੂਰ ਗਿਣਤੀ ਵਿੱਚ ਸ਼ਾਮਲ ਹੋ ਕੇ ਭਾਈਚਾਰਕ ਸਾਂਝ ਅਤੇ ਏਕਤਾ ਦਾ ਸੁਨੇਹਾ ਦੇਣਗੇ।
ਸੂਬਾਈ ਆਗੂ ਡਾ. ਮਿੱਠੂ ਮੁਹੰਮਦ ਨੇ ਕਿਹਾ ਕਿ ਰਮਜ਼ਾਨ ਦੇ ਪਵਿੱਤਰ ਮਹੀਨੇ ਦੌਰਾਨ ਵੱਖ-ਵੱਖ ਭਾਈਚਾਰਿਆਂ ਵੱਲੋਂ ਰੋਜ਼ਾ ਇਫ਼ਤਾਰ ਕਰਵਾਏ ਗਏ, ਜਿਸ ਲਈ ਮੁਸਲਿਮ ਭਾਈਚਾਰਾ ਸਾਰਿਆਂ ਦਾ ਦਿਲੋਂ ਧੰਨਵਾਦੀ ਹੈ। ਇਹ ਸਾਰਾ ਦ੍ਰਿਸ਼ ਭਾਈਚਾਰੇ, ਪਿਆਰ ਅਤੇ ਸਰਬ ਸਾਂਝੀ ਵਾਲਤਾ ਦੀ ਜੀਵੰਤ ਮਿਸਾਲ ਹੈ।
ਉਨ੍ਹਾਂ ਕਿਹਾ ਕਿ ਈਦ ਦੀ ਨਮਾਜ਼ ਤੋਂ ਬਾਅਦ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਮਸਜਿਦ ਕਮੇਟੀ, ਗਊਸ਼ਾਲਾ ਪ੍ਰਬੰਧਕ ਕਮੇਟੀ, ਮੰਦਰ ਕਮੇਟੀ, ਦੁਕਾਨਦਾਰ ਯੂਨੀਅਨ ਅਤੇ ਹੋਰ ਵੱਖ-ਵੱਖ ਸੰਸਥਾਵਾਂ ਤੇ ਜਥੇਬੰਦੀਆਂ ਦੇ ਨੁਮਾਇੰਦੇ ਵੱਡੀ ਗਿਣਤੀ ਵਿੱਚ ਪਹੁੰਚ ਕੇ ਮੁਸਲਿਮ ਭਾਈਚਾਰੇ ਨੂੰ ਈਦ ਮੁਬਾਰਕ ਕਹਿਣਗੇ, ਜਿਸ ਨਾਲ ਆਪਸੀ ਪਿਆਰ ਤੇ ਸਾਂਝ ਹੋਰ ਮਜ਼ਬੂਤ ਹੋਵੇਗੀ।
ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਡਾਕਟਰ ਮਿੱਠੂ ਮੁਹੰਮਦ, ਦੁਕਾਨਦਾਰ ਯੂਨੀਅਨ ਦੇ ਪ੍ਰਧਾਨ ਗਗਨ ਸਰਾ, ਅਵਤਾਰ ਸਿੰਘ ਬਾਵਾ,ਮਨਦੀਪ ਕੁਮਾਰ ਚੀਕੂ, ਰਾਹੁਲ ਕੌਸਲ, ਮੰਦਰ ਕਮੇਟੀ ਦੇ ਪ੍ਰਧਾਨ ਵਿਜੇ ਕੁਮਾਰ, ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਬਾਬਾ ਸ਼ੇਰ ਸਿੰਘ, ਹਰੀ ਸਿੰਘ, ਨਰਿੰਦਰ ਸ਼ਰਮਾ, ਮਹਿਲ ਕਲਾਂ ਮਸਜਿਦ ਦੇ ਮੌਲਵੀ ਕਾਰੀ ਅਜੂਬ ਖਾਨ, ਪੱਤਰਕਾਰ ਲਕਸਦੀਪ ਗਿੱਲ, ਪੱਤਰਕਾਰ ਗੁਰਪ੍ਰੀਤ ਸਿੰਘ ਅਣਖੀ,ਸਰਪੰਚ ਸਰਬਜੀਤ ਸਿੰਘ ਸੰਧੂ, ਸਰਪੰਚ ਕਿਰਨਾਂ ਰਾਣੀ ਦੇ ਸਪੁੱਤਰ ਅਰੁਣ ਬਾਂਸਲ, ਹਰਵਿੰਦਰ ਕੁਮਾਰ ਜਿੰਦਲ, ਬੂਟਾ ਸਿੰਘ ਗੰਗੋਹਰ, ਪ੍ਰੇਮ ਸਿੰਘ ਸਹਿਜੜਾ, ਬੱਗਾ ਖਾਨ (ਫਰੂਟ ਵਾਲੇ), ਪ੍ਰੇਮ ਕੁਮਾਰ ਪਾਸੀ, ਡਾਕਟਰ ਰਾਜੂ ਖਾਨ, ਡਾਕਟਰ ਮੁਸ਼ਤਾਕ ਅਲੀ, ਡਾਕਟਰ ਰਜਾਕ ਅਲੀ, ਡਾਕਟਰ ਸਕੀਲ ਮੁਹੰਮਦ, ਡਾਕਟਰ ਗਫੂਰ ਖਾਨ, ਇਕਬਾਲ ਖਾਨ, ਡਾਕਟਰ ਕਾਕਾ ਖਾਨ, ਗੁਲਜਾਰ ਖਾਨ, ਦਿਲਬਰ ਖਾਨ, ਹਾਜੀ ਬਸ਼ੀਰ ਮੁਹੰਮਦ, ਡਾਕਟਰ ਅਬਰਾਰ ਹੁਸੈਨ, ਸਿੱਧੂ ਟੈਲੀਕੌਮ, ਜਮੀਲ ਖਾਨ ਜੀਲਾ, ਨਸੀਬ ਖਾਨ, ਜਸਬੀਰ ਖਾਨ, ਅਕਬਰ ਖਾਨ, ਸਲੀਮ ਖਾਨ, ਮਹਿਤਾਬ ਖਾਨ ਆਦਿ ਤੋਂ ਇਲਾਵਾ ਵੱਡੀ ਗਿਣਤੀ ਵਿੱਚ ਲੋਕ ਹਾਜ਼ਰ ਸਨ।
